धेरै कुरा सारेर ३०८ धाराको नेपालको संविधान २०७२ लेख्न ६ सयजनालाई आठ वर्ष लाग्यो। खर्च अर्बौं रुपैयाँ भयो। नेपालको संविधान २०७२ सायद आजसम्म पनि सबभन्दा कान्छो होला। साढे ४ वर्षको बच्चा संविधान आज बामे सर्दै छ। सबै धारा पूर्ण क्रियाशील भइसकेका छैनन्। संविधानले नै क्रियाशील हुन तीन वर्षको समय दियो। अहिल्यै माथिल्लो सदन राष्ट्रियसभा सदस्य पनि प्रधानमन्त्री बन्न र राष्ट्रपतिलाई कार्यकारी अधिकारसम्पन्न बनाउन संशोधन गर्ने कुरा गर्छन्। दलभित्रै विरोध भएकाले मात्र हाललाई संशोधन टर्‍यो।

५५ प्रतिनिधिले सन् १७८७ मा अमेरिकी संविधान लेखे। संशोधन गर्न संघीय ससंद् अर्थात् कंग्रेसले ३३ वटा प्रस्ताव गरे पनि राज्य अथवा स्टेटहरूले अनुमोदन नगर्दा अमेरिकी संविधान हालसम्म २७ वटा मात्र संशोधन भएको छ। १७० भन्दा बढी देशले अमेरिकी संविधानलाई नमुना संविधान मानेरै पछ्याएका छन्। अमेरिकी संविधान सबभन्दा पुरानो लिखित संविधान हो।