बलिउडको प्रतिक्षित चलचित्र ‘सुर्यवंशी’को ट्रेलर सार्वजनिक भएको लामो समय भइसकेको छ। ४ मिनेट लामो ट्रेलरमा एक्सन, कमेडी तथा पारिवारिक पीडाको कुरालाई पनि स्थान दिइएको छ।
‘सिंघम’ र ‘सिम्बा’को सिरिज चलचित्र ‘सुर्यवंशी’मा सिंघम स्टार अजय देवगण र सिम्बा स्टार रणवीर सिंह पनि देखिनेछन्। कट्रिना कैफ चलचित्रकी मुख्य नायिका हुन्।
रोहित शेठ्ठीको निर्देशन रहेको चलचित्रले मुम्बईमा भएको आतकंवादी हमला र एक प्रहरी अफिसरको ड्युटीलाई प्रस्तुत गरेको छ। मार्च २४ मा रिलिज हुने यस चलचित्रलाई दर्शक तथा चलचित्रकर्मीले पनि प्रतिक्षा गरिरहेका छन्।
तर विश्वभर कोरोना भाइरसको त्रास रहेको छ। भारतमा पनि यो भाइरस फैलिइसकेको छ। यसको असर चलचित्रको कलेक्सनमा पनि परेको छ।
त्यसैले अन्य निर्माताहरुले पनि चलचित्र रिलिज गर्ने वा नगर्ने दोधारमा परेका छन्। चलचित्र रिलिज गरेर पनि दर्शकहरु हलमा आएनन् भने रिलिज गर्नु सार्थकता केही नहुने उनीहरुको ठम्याई रहेको छ।
चलचित्रका निर्देशक रोहितले प्रचारप्रसारमा राम्रै लगानी भइसकेकाले चलचित्र नसर्ने बताउँछन्।
