२०७५ साल फागुन २८ गते टेन्डरमार्फत् लुम्बिनी प्रादेशिक अस्पतालले परिसरका ७३ वटा सटर भाडामा लगाउने सूचना निकाल्यो। यहाँका प्रतिष्ठित व्यवसायीहरुले निकै महँगो मासिक भाडा तिर्नेगरी टेन्डर पारेँ। प्रदेश न. ५ कै ठूलो अस्पतालको बाहिरपट्टि सरकारी चिकित्सकमार्फत् चेकजाँच गराउन पाउने भएपछि साढे ५ लाख मासिक भाडा तिर्नसमेत व्यवसायी पछि हटेनन्।
सोहीअनुसार अस्पतालले २०७६ जेठ २९ गतेदेखि सम्झौता लागू हुनेगरी ५ वर्षका लागि व्यवसायहरुलाई सटर भाडामा लगायो। सटर भाडाबापत अस्पतालले वार्षिक ९ करोड आम्दानी गर्दै आएको थियो। तर प्रदेश न. ५ सरकारले लुम्बिनी प्रादेशिक अस्पताल आफू मातहत आएलगत्तै अस्पताल परिसरका ७३ वटा सटर हटाउने निर्णय गरेपछि खैलाबैला मच्चिएको हो।
