धनुषाको जनकपुरधाम उप–महानगरपालिका १ भानुचोकबाट पेस्तोलसहित दुईजनालाई पक्राउ गरिएको छ। पक्राउ पर्नेमा धनुषा क्षिरेश्वरनाथ नगरपालिका १ रमदैया बस्ने ४२ वर्षीय जितेन्द्रकुमार यादव र सोही ठाउँका ३० वर्षीय कुमोद नारायण झा रहेको प्रहरीले जनाएको छ। 

शनिबार साँझ ६ बजेतिर बा.१४ च. ७४५९ नम्बरको महेन्द्रा टुभ कारले ज.९ प.४८०६ नम्बरको मोटरसाइललाई ठक्‍कर दिँदा पक्राउ परेका व्यक्तिको साथबाट पेस्तोल बरामद भएको हो। 

कारले मोटरसाइकललाई ठक्‍करपछि गएको प्रहरी टोलीले चेकजाँचको क्रममा पेस्तोल बरामद गरेको हो। उनीहरुले कारको डिक्‍कीमा लुकाएर राखेको ठूलो चाइनिज पेस्तोल १ थान, पेस्तोलमा लाग्ने गोली ६ राउण्ड र म्यागाजिन थान १ बरामद भएको प्रहरी नायव उपरिक्षक रामेश्वर कार्कीले जनाए।

कारको ठक्‍करबाट महोत्तरी जिल्लाको पिपरा गाउँपालिका ५ का २० वर्षीय पारस कुमार यादव र धनुषाको हंसपुर नगरपालिका २ बघचौराका ३० वर्षीय शिवकुमार मण्डल घाइते भएका छन्।