अमेरिकाको ओहायो राज्यको दक्षिणी भागमा अवस्थित फेयरफिल्डमा सोमबार एक नेपालीभाषीको ख्यालख्यालमै ज्यान गएको छ ।
आफन्तसँग रहेको बन्दूकलाई खेलौना सम्झिइ श्रीमतीले चलाउँदा उनका श्रीमानको मृत्यु भएको बताइएको छ । मृत्यु हुने नेपालीभाषी भुटानी टीका कट्टेल रहेको सिनसिनाटी भुटि्न कम्युनिटीले जनाएको छ ।
यो पनि हेर्नुहोस्
मृतकका आफन्तहरूले घटना बन्दुकका बारेमा ज्ञान नभएका कारण भएको जनाएका छन् । उनीहरूका अनुसार मृतक कट्टेलकी बिमारी आमालाई भेटन शनिवार ओहायो राज्यको फेयरफिल्डस्थित सिग्मण्ड वे मा रहेको उनको घरमा अन्य आफन्त पनि भेला भएका थिए । सोही बेला बिरामी भेटन आएका आफन्तको गोजीबाट खसेको बन्दूक खेलाची सम्झी चलाउँदा कट्टेलको टाउकोमा लागेको थियो ।
स्थानीय सञ्चारमाध्यमहरूले पनि घटना नियोजित नभएको बताएका छन् ।
आरोपी सुभा कट्टेललाई घरमै अनुसन्धानमा रहनुपर्ने र ओहायो राज्यबाट बाहिर जान नपाउने गरी तारिखमा छोडिदिएको छ ।
लामो समयसम्म नेपालको झपास्थित गोलधाप शिविरमा शरणार्थी जीवन बिताएको कट्टेल परिवार सन २००९ मा अमेरिकाको न्यु हेम्प्सायरमा पुनर्बास भएको थियो । सन २०१६ मा यो परिवार ओहायोको दक्षिणी भागमा रहेको फेयरफिल्डमा सरेको थियो ।
