तिम्रो रगतको कण कण
र पसिनाको थोपा थोपाका
मूल्यको कथा
लेख्न चाहन्छु बा ।
तिम्रा हरेक
दुःख, पीडा अनि वेदनाका
महासागरका
अमूल्य छालहरुका
ब्यथा लेख्न चाहन्छु म ।
बुढ्यौलीले पाकेका
ती सेताम्मे
केशहरुको
सहनशीलताको
परिभाषा लेख्न चाहन्छु म ।
वर्षौ देखि
लाखौं सपना देख्दै
कहिले ननिदाएका
कदापि नथाक्ने
ती चम्किला
नानीहरुको
बिपना लेख्न चाहन्छु म ।
तिम्रो त्यो निर्दोष
अनुहारमा
खुम्चिएको
ती नशाका
रेशा रेशाको
आयुको भाषा लेख्न चाहान्छु बा म ।
तिम्रा ती कलेटी परेका
ओठहरुको
अद्भूत
मिठो मुस्कानको
उल्लास र उमगंको
आशा लेख्न चाहन्छु म ।
तिम्रो त्यो
सत्तरी नाघेको उमेरको
उर्वर जोशिलो
यौवन रुपको
रहर र जुझारुपनाको
उदाहरणको
नवीन उपन्यास लेख्न चाहन्छु म बा !