नारायणगढमा रहेको हंस बहुद्देश्यीय सहकारी संस्थाले प्राङ्गारिक उत्पादन र बजारीकरण शुरु गरेको छ।

कृषि उत्पादनमा विषादीको बढी प्रयोगका कारण मानव स्वास्थ्यमा गम्भीर असर परेको भन्दै आफ्ना सदस्य र सर्वसाधारणलाई प्राङ्गारिक उत्पादन बिक्री गर्ने उद्देश्यले सहकारीले यो काम शुरु गरेको जनाएको छ।

संस्थाका अध्यक्ष दिनेशकुमार चुकेका अनुसार नारायणगढ बजारमा मासिक रु १० हजार भाडा तिर्ने गरी दुई वटा सटरमा हंस प्राङ्गारिक बजार शुरु गरिएको छ।

यसअघि नै संस्थाले हंस कृषि अनुसन्धान तथा उत्पादन केन्द्रमार्फत प्राङ्गारिक उत्पादन गर्दै आएको थियो। बजार भने यसै साताबाट सञ्चालनमा आएको हो।

बजारमा मनाङ, मुस्ताङ र जुम्लामा उत्पादित आलु, अदुवा, किबी, स्याउ, मार्सी चामल, कालो सिमीको दाल, ओखर जस्ता कृषि उत्पादन बिक्रीका लागि राखिएको छ।

यसैगरी चितवनको तल्लो काउले क्षेत्रमा उत्पादन भएका भुइँ स्याउ, सुन्तला, मौसम, साग, फर्सी, स्कुस, केराउ र मकै जस्ता उत्पादन पनि बजारमा रहेको चुकेले जानकारी दिए।

सो बजारमा इलामको चिया, तिल, अकबरे अचार, टिमुर र अलैँची जस्ता उत्पादन पनि बिक्रीका लागि राखिएको छ। सहकारीको आफ्नै उत्पादन आएपछि ती उत्पादन र देशैभरमा भएका प्राङ्गारिक उत्पादनलाई सर्वसाधारणसम्म पुर्याउने लक्ष्य रहेको चुकेको भनाइ छ।

सहकारीको उत्पादन केन्द्रमा भर्खरै मात्र दुई बिघा १० का जमिनमा लगाइएको धान काटेर तरकारी लगाउने तयारी गरिएको छ। थप करीब पाँच बिघा जमीनमा प्राङ्गारिक तरकारी लगाइने तयारी गरिएको जनाइएको छ।

विसं २०५६ मा स्थापना भएको सो सहकारीमा हाल तीन हजार ४०० सदस्य रहेका छन्। शेयर पूँजी मात्र रु नौ करोड ५० लाख रहेको सहकारीको हालसम्मको निक्षेप रु ४८ करोड र लगानी रु ५४ करोड रहेको उनले जानकारी दिए।(रासस)