बैंक तथा वित्तिय संस्थाको प्रविधि दुरूपयोग गरि अर्वौं रकम झिकेर विदेश लैजाने योजनामा संग्लन १२ जनालाई प्रहरीले पक्राउ गरेको छ।
महानगरीय प्रहरी अपराध महाशाखा, काठमाडौंले बुधबार पत्रकार सम्मेलन गरि पक्राउ परेका सवैलाई सार्वजनिक गरेको हो। प्रहरीले उनीहरुको साथबाट ४० लाख ५० हजार रुपैयाँ समेत बरामद गरेको छ।
पक्राउ पर्नेमा नुवाकोट मेघाङका लवाङ तामाङ, रसुवा नौकुण्ड घर भएका लक्ष्मी लामा तामाङ, निर्मला तामाङ र निमा तामाङ, काठमाडौं काभ्रेस्थलीका संजय घले, सर्लाही हरिवनका पुष्पराज खड्का, लमजुङ दोर्दी गाउँपालिकाका विद्यासागर लामिछाने छन्।
त्यस्तै तनहुँ भानु नगरपालिका ९ का श्रवणकुमार श्रेष्ठ, भारत कोलकत्ताका शुबन्कर पन्जा, कैलाली भजनी नगरपालिका ३ का विजय शाह र चन्द्रबहादुर बुढा पक्राउ परेको प्रहरीले जनाएको छ।
महानगरीय अपराध महाशाखा टेकुका एसएसपी सहकुल थापाले भारतको मुम्बईमा बस्ने काले भन्ने पिटरले ५ अर्ब लुट्ने योजनाका साथ नेपालीलाई सम्पर्क गरी बैंक तथा वित्तिय संस्थाको रकम निकाल्ने काममा प्रयोग गरेको बताए।
उनीहरुले कृषि विकास बैंकका कर्मचारीका युजर आइडी प्रयोग गरेर ४ करोड ७३ लाख रुपैयाँ ट्रान्सफर गरेका थिए। ट्रान्सफर गरेको रकममध्ये ६० लाख रुपैयाँ उनीहरुले निकालेको र निकालेको मध्ये ४० लाख ५० हजार रुपैयाँ बरामद भएको एसएसपी थापाले जानकारी दिए।
लुटका लागि उनीहरुले कृषि विकास बैंकको लाहान शाखाबाट कारोबार गरेको प्रहरी अनुसन्धानमा खुलेको छ। पत्रकार सम्मेलनमा कृषि विकास बैंकका उपप्रबन्धक दीर्घ अर्यालले बैंकको लहान शाखाबाट ४ करोड ७३ लाख रुपैयाँ चोरी भएको जानकारी दिए। निकालिएको सवै रकम शाखाको ब्याज आम्दानी भएको उनले बताए।
अनुसन्धान गर्न कृषि विकास बैंकले लहान शाखाका सबै कर्मचारीहरूलाई निलम्बन गरी छानबिन प्रक्रिया अघि बढाएको अर्यालले जानकारी दिए। पहिलो पटक असोज ५ गते आइतबार पानस रेमिटेन्सबाट एकै व्यक्तिले ६० लाख रूपैयाँ झिकेका थिए।
उनलाई प्रहरीले पछ्याउँदा ३० लाख नगदसहित पक्रन सफल भएको थियो। समातिएका मार्फत् नै १२ जनालाई नियन्त्रणमा लिन सकेको प्रहरीले जनाएको छ।
यसरी भएको थियो घटना
घटना यही असोज ५ गते आइतबारको हो। बानेश्वरमा रहेको पानस रेमिटबाट केही व्यक्तिहरूले अस्वाभाविक रुपमा पैसा निकालेपछि गतिविधि शङ्कास्पद लागेर कर्मचारीले महानगरीय अपराध महाशाखामा जानकारी गराए ।
त्यसपछि खटिएको महाशाखाको टोलीले पैसा निकाल्दै गर्दा केही व्यक्तिलाई पक्राउ गर्यो। उनीहरुसँग सोधपुछ गर्दा नुवाकोटका लवाङ तामाङ घटनामा संलग्न रहेको खुल्न आयो।
खोजतलासका क्रममा उनलाई प्रहरीले पक्राउ गर्न सफल भएपछि थप रहस्य खुल्न पुग्यो। उनको साथबाट प्रहरीले ३१ लाख बरामद गरेपछि घटनाले अर्कै मोड लियो ।
कृषि विकास बैंकको रकम निकालेको पत्ता लागेपछि प्रहरीले जिल्लामा सर्कुलर गरेर प्रहरीलाई ‘हाई अलर्ट’मा बस्न भनियो। प्रहरी वरिष्ठ उपरीक्षक थापाले भने, ‘लवाङसँगको सोधपुछमा विदेशी नागरिक काले भन्ने पिटरसँग उनको सम्बन्ध रहेको जानकारी प्राप्त भएपछि घटनामा ठूलै गिरोह रहेको रहस्य पत्ता लाग्यो र हामीले अनुसन्धानलाई थप तीव्रता दियौं।’
उनका अनुसार कृषि विकास बैंकमा बुझ्दा करोडौँ रकम विभिन्न व्यक्तिको खातामा पठाई सकिएको फेला पर्यो । त्यो खाताको पैसा लिन आउने सबैलाई नियन्त्रणमा लिन भन्दै बैंकमा सर्कुलर भयो। सोही क्रममा प्रहरीले १२ जना पक्राउ गरेको थापाले जानकारी दिए।
नेपाली नागरिकलाई खातामा जम्मा भएको रकमको १५ देखि ३५ प्रतिशतसम्म दिने र अरू रकम हुण्डीमार्फत भारत पठाउने सर्तमा व्यक्तिको नाममा ह्याकरले पैसा पठाएको खुल्न आएको उनले जानकारी दिए। सोही प्रक्रिया चल्दै गर्दा प्रहरीले उनीहरुलाई पैसा निकाल्नुअघि नै पक्राउ गरेको थियो। ‘तर पनि ७० लाख भने निकालेको र १० लाख भने हुण्डीमार्फत विदेश पठाइसकेको फेला परेको छ अरू पैसा बरामद भएको छ’, महाशाखा प्रमुख थापाले भने।
उक्त घटनामा संलग्न रहेको आरोपमा नुवाकोटका लवाङ तामाङ, रसुवाका लक्ष्मी लामा, निर्मला तामाङ र निमा तामाङ, काठमाडौँ तारकेश्वरका सञ्जय घले, सर्लाहीका पुष्पराज खड्का, लमजुङका विद्यासागर लामिछाने, तनहुँका श्रवणकुमार श्रेष्ठ, झक्तपुरका सुनिता श्रेष्ठ, भारत कोलकाताका सुबन्कर पञ्जा, कैलालीका विजय साह र चन्द्रबहादुर बुढालाई प्रहरीले पक्राउ गरेको छ । घटनाका योजनाकार विदेशी नागरिक पिटर भने फरार रहेका छन् ।
प्रहरीका अनुसार उनीहरुले कृषि विकास बैंकबाट रकम रु चार करोड ७३ लाख ९६ हजार ह्याक गरेर व्यक्तिको नाममा पैसा पठाएको तथा पानस रेमिट नयाँ बानेश्वरबाट रु १२ लाख निकालेको तथा अन्य विभिन्न बैंक तथा वित्तीय संस्थाको सफ्टवेयर ह्याक गरी पैसा व्यक्तिको खातामा पठाएको पाइएको छ। यसरी पैसा निकाल्ने नेपाली सहयोगीलाई १५ देखि ३५ प्रतिशत कमिशन दिई बाँकी रकम हुण्डीमार्फत पुनः भारत भारत लैजाने गरेको समेत खुल्न आएको छ ।
पिटरले नेपालका एजेन्टहरूलाई नबिल बैंक, कृषि विकास बैंक लगायतका बैंकहरूमा चल्ती खाता खोल्न लगाई पैसा निकाल्ने गरेको र उनले नेपालबाट रु पाँच अर्बभन्दा बढी रकम निकाल्ने योजना बनाएको खुल्न आएको प्रहरीले जनाएको छ ।
.jpg)
