रोल्पाको थवाङ गाउँपालिका-२ (साविक थबाङ गा.वि.स ७) छेर्लोबाङमा पहिरोमा पुरिएर २ जनाको मृत्यु भएको छ भने ४ जना बेपत्ता भएका छन्। गए राति र आज बिहान परेको अविरल वर्षाका कारणले छेर्लाबाङमा पहिरोले घर पुरिँदा २ जनाको मृत्यु हुनुका साथै चार जना हराइरहेका हुन्।

पहिरोमा परी थबाङ गा.पा. २ छेर्लाोबाङका २८ वर्षिय श्रीकुमारी बुढा र निजका ४ वर्षिय छोरा असल बुढामगरको मृत्यु भएको जिल्ला प्रहरी कार्यालय रोल्पाका प्रहरी नायव उपरीक्षक चित्रबहादुर गुरूङले बताए। उनले हराइरहेका मानिसहरुको उद्धार तथा खोजी भइरहेको बताए।

प्रमुख जिल्ला अधिकारी लक्ष्मण ढकालका अनुसार जिल्ला प्रहरी कार्यालयको समन्वयमा इलाका प्रहरी कार्यालय थबाङ, प्रहरी चौकी खरिबोट रानागाउँबाट प्रहरी टोली घटनास्थल पुगिसकेका छन्।

घर माथिको शहीदमार्ग सडक भासिएर पहिरो जाँदा घटना घटेको ढकालले जानकारी दिए।

वडा नम्बर २ का वडाध्यक्ष बसन्त रोका घटना थाहा पाएलगत्तै दाङबाट थबाङ हिँडेका छन्। उनले घटनास्थल पुगेर तत्कालै राहतको कार्यक्रम लगिने बताए।