मोहन वैद्य नेतृत्वको नेपाल कम्युनिष्ट पार्टी (क्रान्तिकारी माओवादी)ले ‘भारतले विश्वलाई बुद्ध दिएको छ’ भन्ने भारतीय प्रधानमन्त्री नरेन्द्र मोदीको अभिव्यक्तिप्रति आपत्ति जनाएको छ । सो पार्टीका महासचिव वैद्यले सोमबार एक विज्ञप्ति जारी गर्दै उक्त अभिव्यक्तिप्रति आपत्ति जनाएका हुन् ।

गत सेप्टेम्बर २७ मा संयुक्त राष्ट्रसङ्घको महासभामा भारतका प्रधानमन्त्री मोदीले आफ्नो भाषणमा ‘भारतले विश्वलाई बुद्ध दिएको छ’ वाक्यांश प्रयोग गरेका थिए ।

‘हामी त्यसको दृढ विरोध गर्दछौं । नेपालको लुम्बिनीमा जन्मिएका गौतमबुद्ध भारतीय नभएर नेपाली नै रहिआएको कुरा अवगत हुँदाहुँदै उनलाई भारतीय बनाउन खोज्नु नितान्त गलत भएको बेहोरा स्पष्ट गर्न चाहन्छौं’ महासचिव वैद्यले भनेका छन् ।