काठमाडौं: मल्लकालीन दुईमाजु मन्दिर अतिक्रमण गरी बनाइएको टहरामा ताला लगाइएको छ। टुँडिखेलको महत्वपूर्ण हिस्सा रहेको दुईमाजु मन्दिरमा बनाइएको फलामे टहरामा काठमाडौं महानगरपालिका र गुठी संस्थानले ताला लगाएको हो।
मल्ल राजाहरुको देवाली मन्दिरका साथै पृथ्वी नारायण शाहले काठमाडौं विजय गरेपछि शक्ति आराधना गरेको दुईमाजु मन्दिरमा गुठी संस्थान, काठमाडौं महानगरपालिकाको संलग्नतामा भाडामा दिइएको थियो।
त्यसयता, स्थानीयले गुठीको कदमको विरोध गर्दै आएका थिए। दशैं अगाडि नै उनीहरुलाई हटाउनु पर्ने माग स्थानीयले गर्दै आएका थिए। तर तिहारसम्म व्यापार गर्न दिने र त्यसपछि उनीहरुलाई हटाउने सहमति भएको थियो।
काठमाडौं महानगरपालिकाका उपप्रमुख हरिप्रभा खड्गी श्रेष्ठ र गुठी संस्थान काठमाडौं शाखाका प्रुमख शैलेन्द्र पौडेलले टहरामा ताला लगाएका थिए।
