“उज्ज्वल दाइ ! मैले छोरो भेट्न पाइनँ ! आफ्नो छोरो भेट्न पनि ‘अपराधी लोग्ने’को स्वीकृति चाहिने रे !”
कीर्तिपुरको मौसम घमाइलो छ । पाहुनाको स्वागत सत्कार गर्न दिनरात नभनी खटिएको काठमाडौंको साँध जोडिएकाले हुनुपर्छ कीर्तिपुरको आकाश पनि धुवाँधूलो मुक्त छ ।
ठीक उल्टो छ, कीर्तिपुर अस्पतालको दृष्य । दसैं सकिएको छैन । तर कीर्तिपुर अस्पतालमा मानिसहरूको चलहपहल ह्वात्तै बढेको छ । डक्टरहरूको आउजाउ बढेसँगै आर्तहरूको क्रन्दन, चित्कार पनि बढेको छ ।
पारिवारिक जमघट र मेलमिलापको पर्वमा पनि तेजाव आक्रमण विरुद्धका सामाजिक अभियन्ता उज्ज्वलविक्रम थापाले एकदिन विश्राम पाएका छैनन् । कीर्तिपुर अस्पताल ओहोर–दोहोर गरिरहन्छन् ।
