सुदूरपश्चिम प्रदेश ब्युरो। धनगढी : जीर्ण र कच्ची भवन। पानी पर्दा चुहिन्छ। घाम लागे गर्मी हुन्छ। थुनुवा राख्ने ठाउँ छैन। कतिपय प्रहरी त रातभर अन्तै बास बस्छन्। कतै ठाउँ अभावमा पालो गरेर सुत्छन्। नागरिक सुरक्षाका लागि सुदूरपश्चिममा खटिएका प्रहरीले लामो समयदेखि भोग्दै आएको समस्या हो यो।
भैंसीगोठ रङरोगन गरी चिटिक्क पारिएको छ। भित्र–बाहिर गर्दा टाउको ठोक्किन्छ। हरेक वर्ष त्रिपाल फेरेन भने पानी चुहिन्छ। बर्खामा सर्पको डर उस्तै। यो दृश्य अछामको रामारोशन–३ सान्तडास्थित प्रहरी चौकीको हो। यही भवनबाट प्रहरीले सुरक्षा दिँदै आएको छ।
यस्तो समस्या सुदूरपश्चिम प्रदेशका अधिकांश प्रहरी कार्यालयले भोग्दै आएका छन्। नागरिकको सुरक्षामा खटिनुपर्ने प्रहरीलाई कार्यालयको चिन्ता देखिन्छ। अभियुक्त ल्याउँदा त समस्या थपिन्छ।
