तनहुँको व्यास नगरपालिका–१ रतौलीटारस्थित सुधार केन्द्रमा बस्दै आएका एक युवक आज मृतावस्थामा फेला परेका छन् ।बन्दीपुर गाउँपालिका–१ डुम्रे घर भई लर्निङहोम फाउण्डेशन नेपालद्वारा सञ्चालित सुधार केन्द्रमा बस्दै आएका २२ वर्षीय नवीन गुरुङ देवघाट गाउँपालिका–३ साराङघाटस्थित सेती नदीको किनारमा मृतावस्थामा फेला परेका हुन् ।
स्थानीयवासीले नदी किनारमा मृतावस्थामा शव देखेपछि प्रहरीलाई खबर गरेका थिए । गुरुङको शव परीक्षणका लागि दमौली अस्पताल ल्याइएको जिल्ला प्रहरी कार्यालय तनहुँका प्रहरी नायब उपरीक्षक एवं प्रवक्ता लीलाराज लामिछानेले जानकारी दिए ।
फाउण्डेशनले लागुऔषध दुव्र्यसनीविरुद्ध सचेतना जगाउने काम गर्दै आइरहेको छ । गुरुङ विगत दुई महीनादेखि सोही सुधार केन्द्रमा बस्दै आएका थिए । कात्तिक ६ गते फाउण्डेशनबाट १२ युवा भागेपछि प्रहरीलाई खबर गरिएको थियो ।
अन्य ११ भने घर पुगे पनि गुरुङ घर नपुगेपछि प्रहरी र परिवारले उनको खोजी गरेको थियो । “त्यहाँबाट भागेका सबैको घरमा सोधपुछ गरेका थियौँ”, प्रहरी नायब उपरीक्षक लामिछानेले भने, “सबै जना घर पुगे पनि गुरुङ भने सम्पर्कविहीन भएका थिए”, प्रनाउ लामिछानेका अनुसार घटना सम्बन्धमा अनुसन्धान भइरहेको छ ।
