जनआस्था साप्ताहिकका प्रधानसम्पादक किशोर श्रेष्ठ र हास्यकलाकार तथा राष्ट्रिय स्वतन्त्र पार्टी (रास्वपा) नेता हिमेश पन्तबीच सहमति भएको छ। 

उक्त सञ्चारमाध्यममा आफूविरुद्ध समाचार छापिएपछि पन्तले साइबर ब्यूरोमा उजुरी दिएका थिए। त्यसकै लागि छलफल गर्न भन्दै उनलाई नेपाल प्रहरीको साइबर ब्यूरो टोलीले शनिबार दिउँसो घरबाटै ब्यूरोमा लगेको थियो।

ब्यूरोमै उजुरीकर्ता पन्तलाई पनि प्रहरीले बोलाएको थियो। केही घण्टाको छलफलपछि उनिहरूबीच प्रहरीले सहमति गराएर छोडेको हो।

दुबैबीच सामाजिक सञ्जालहरूमा एकअर्कालाई घोचपेच गरेर नलेख्ने सहमति भएको छ। र समाचारको विषयमा भने नेपाल प्रेस काउन्सिलमा जाने सहमति भएको छ। 

पन्त र उनको परिवारले अरूको जग्गा हडपेको दाबीसहित श्रेष्ठले समाचार प्रकाशन गरेपछि उनीहरूबीच सामाजिक सञ्जालमा विवाद हुँदै आएको थियो।