जुम्लाका युवा गायक तथा कलाकार अर्जुन सुनार यतिबेला आफ्नो नयाँ गीत ‘कर्णाली तिर’ मार्फत चर्चामा छन्। सरकारी सेवामा आबद्ध रहँदै संगीतलाई निरन्तरता दिइरहेका सुनारले हालै सार्वजनिक गरेको गीतमार्फत कर्णालीका पीडा, संघर्ष र यथार्थलाई सशक्त रूपमा प्रस्तुत गरेका छन्। गीत सार्वजनिक भएपछि प्राप्त सकारात्मक प्रतिक्रियाले उनलाई सांगीतिक यात्रामा अझ दृढ बनाएको छ।

सुनारका अनुसार ‘कर्णाली तिर’ उनको सांगीतिक यात्राको एउटा महत्वपूर्ण मोड हो। सुरुमा गीतलाई बजारमा ल्याउने कि नल्याउने भन्ने अन्योल रहे पनि दर्शक–श्रोताको उत्साहजनक प्रतिक्रियाले आगामी दिनमा पनि संगीतलाई निरन्तरता दिने ऊर्जा दिएको छ।

‘द भोइस अफ नेपाल’ सिजन–५ का प्रतिस्पर्धीसमेत रहेका सुनारका लागि राष्ट्रिय मञ्चमा पहिलोपटक उभिनु विशेष अनुभव थियो। तर उनी भन्छन्, आफ्नै सिर्जनालाई दर्शकमाझ पुर्‍याउँदाको खुसी अझ फरक र विशेष छ। उनका लागि ‘कर्णाली तिर’  गीत मात्र होइन, वर्षौंदेखिको सपना र संघर्षको प्रतिफल पनि हो।\यो गीत तयार भएर पनि दुई वर्षसम्म सार्वजनिक हुन सकेको थिएन। सरकारी जागिर, कार्यालयको जिम्मेवारी र कर्णालीको भौगोलिक कठिनाइका कारण गीत रोकिएको थियो। बाल्यकालदेखिका साथी राजेश विश्वकर्माको हौसलापछि भने उनले गीतलाई अन्तिम रूप दिए।

विद्यालय जीवनदेखि नै संगीतप्रति रुचि राख्ने सुनारले स्थानीय कलाकारहरूबाट प्रेरणा पाएका थिए। विभिन्न सांगीतिक प्रतियोगितामा सहभागी हुँदै उनले आफ्नो प्रतिभालाई निखारे। ‘मध्यपश्चिम सुपर आइडल’ मा प्रथम भएपछि संगीतमा केही गर्न सकिन्छ भन्ने आत्मविश्वास झन् बलियो बनेको उनी सम्झिन्छन्।

त्यसपछि विभिन्न रियालिटी शोमा सहभागिता जनाएका सुनारले केही समय भोकल प्रशिक्षणसमेत लिए। अन्ततः ‘द भोइस अफ नेपाल’ मा पुगेर राष्ट्रिय स्तरमा आफ्नो आवाज प्रस्तुत गर्ने अवसर पाए।

संगीत यात्राको सुरुवाती चरणमा परिवारको साथ भने त्यति थिएन। परिवारले संगीतमा भविष्यभन्दा पनि जागिरमा स्थायित्व देखेकाले उनलाई सरकारी सेवातर्फ लाग्न सुझाव दिएको थियो। तर समयसँगै परिस्थितिले मोड लियो। प्रतियोगिताहरूमा सफलता र राष्ट्रिय मञ्चमा पुगेपछि परिवारको दृष्टिकोण बदलियो। अहिले परिवार नै उनको सबैभन्दा ठूलो प्रेरणा बनेको छ।

‘कर्णाली तिर’ मा उनले अभिनयसमेत गरेका छन्। अभिनय गर्ने योजना नभए पनि परिस्थितिले उनलाई क्यामेराअघि उभ्यायो। गीत सार्वजनिक भएपछि गायनसँगै अभिनयको पनि प्रशंसा भइरहेको छ।

गीतका शब्द तथा संगीत रबिन भुसालले सिर्जना गरेका हुन्। कर्णालीको गरिबी, अभाव, वैदेशिक पलायन र राजनीतिक विडम्बनालाई गीतले मार्मिक रूपमा प्रस्तुत गरेको छ। गीतले कर्णालीका पीडामात्र होइन, त्यहाँको सामाजिक यथार्थलाई पनि उजागर गरेको छ।

गीतको अर्को विशेषता यसको निर्माण प्रक्रिया हो। भिडियोमा प्रयोग भएका अधिकांश कलाकार, प्राविधिक जनशक्ति र स्रोत–साधन कर्णालीकै हुन्। बाहिरबाट कलाकार ल्याउनुको सट्टा स्थानीय प्रतिभालाई अवसर दिने उद्देश्यले सम्पूर्ण टिम कर्णालीकै बनाइएको थियो।

सुनारका अनुसार कर्णाली विकटता र अभावको कथा मात्र होइन, अपार सम्भावना, प्राकृतिक सौन्दर्य, संस्कृति र इतिहासको धनी भूमि पनि हो। त्यसैले आगामी दिनमा पनि आफ्नो क्षेत्रको साहित्य, संस्कृति र जीवनशैलीलाई गीतमार्फत बाहिर ल्याउने उनको योजना छ।

जागिर र संगीतलाई सँगसँगै अगाडि बढाइरहेका अर्जुन सुनारको यात्रा अहिले धेरै युवाका लागि प्रेरणाको स्रोत बनेको छ। ‘कर्णाली तिर’ को सफलताले उनी गायकका रूपमा मात्र होइन, कर्णालीको कथा बोल्ने नयाँ पुस्ताका प्रतिनिधि कलाकारका रूपमा स्थापित हुने संकेत दिएको छ। यद्यपि, निरन्तरताको उडान जारी राख्नु पर्नेछ।