बलिउड अभिनेत्री डेजी शाह सामाजिक सञ्जालमा निकै सक्रिय रहन्छिन् र उनका पोस्टहरू प्रायः भाइरल हुने गर्छन्। 

कार्यक्षेत्रको कुरा गर्दा, डेजी शाह हालै रिलिज भएको फिल्म ‘बिहू अट्याक’ मा मुख्य भूमिकामा देखिएकी थिइन्। 

उनलाई बलिउडमा विशेष पहिचान भने सलमान खान अभिनीत फिल्म ‘जय हो’ बाट प्राप्त भएको थियो।

अब डेजी शाह ठूलो पर्दामा नयाँ अवतारमा दर्शकमाझ आउन तयार छिन्। उनी आगामी फिल्म ‘डीजीपी कश्मीर’ मा पहिलो पटक आईपीएस अधिकारीको भूमिकामा देखिने भएकी छन्। 

हालै फिल्मको टिजर सार्वजनिक गरिएको कार्यक्रममा सम्पूर्ण कलाकार टोली सहभागी भएको थियो।

यसअघि पनि डेजीले प्रहरीको भूमिका निर्वाह गरिसकेकी छन्, तर यसपटक उनी आईपीएस अधिकारीको भूमिकामा देखिन लागेकी हुन्, जसलाई लिएर उनी निकै उत्साहित छिन्।

डेजीले आफ्नो भूमिकाबारे भनिन्, 'मैले यसअघि प्रहरीको भूमिका निभाएकी थिएँ, तर अहिले आईपीएस अधिकारीको भूमिकामा पुग्नु मेरो लागि विशेष अनुभव हो। अझ यो फिल्म कश्मीरमा भएका धेरै वास्तविक घटनाबाट प्रेरित भएकाले झन् अर्थपूर्ण बनेको छ। बाल्यकालदेखि नै मेरो सपना आईपीएस अधिकारी बन्ने थियो।'

इम्तियाज भट्ट को निर्देशनमा निर्माण भइरहेको ‘डीजीपी कश्मीर’ फिल्म कश्मीर क्षेत्रमा सुरक्षा बल र प्रहरी अधिकारीहरूले सामना गरेका संघर्ष, साहस र बलिदानमा आधारित रहेको बताइएको छ।

फिल्मबारे थप बोल्दै डेजीले भनिन्, 'यो फिल्म कश्मीरका ती गुमनाम नायकहरूका लागि हो, जसको योगदानबारे धेरै मानिसलाई जानकारी छैन। उनीहरूको कथा जनतासम्म पुग्न आवश्यक छ। यस फिल्ममार्फत दर्शकहरूले मेरो फरक शैली देख्न पाउनेछन्, विशेष गरी एक्सन दृश्यहरूमा।'

डेजी शाहले जुलाई महिनाबाट आफ्नो भागको छायांकन सुरु गर्नेछिन्। त्यसका लागि उनी अहिले शारीरिक रूपमा आफूलाई तयार पारिरहेकी छन्।

उनले भनिन्, 'मेरो छायांकन अझै सुरु भएको छैन, तर तयारीका लागि मसँग करिब एक महिना समय छ। म राष्ट्रिय स्तरकी शूटर पनि हुँ, त्यसैले त्यो अनुभवले मेरो भूमिकालाई अझ प्रभावकारी बनाउन मद्दत गर्नेछ।'