क्यानडामा नयाँ सरकार गठनका लागि सोमवार संघीय निर्वाचन हुँदैछ । १० प्रोभिन्स र तीन टेरिटोरी रहेको क्यानडामा यसपल्ट आधा दर्जनभन्दा धेरै राजनीतिक पार्टी चुनावी प्रतिस्पर्धामा छन् । नयाँ सरकारले उसैगरी आगामी चार बर्षे शासनको बागडोर सम्हाल्नेछ ।
निर्वाचनअघिका सर्वेक्षणअनुसार, यसपल्ट पनि ‘कन्जरवेटिभ पार्टी अफ क्यानडा’ र ‘लिबरल पार्टी अफ क्यानडा’वीच नै मुख्य प्रतिस्पर्धा हुनेछ । कन्जरवेटिभले बहुमत ल्याए एन्ड्रिउ चिअर नयाँ प्रधानमन्त्री बन्नेछन् । लिबरलले बहुमत पाए जष्टिन ट्रयुडो प्रधानमन्त्रीमा दोहोरिने छन् ।
भारतीयमूलका जगमीत सिंह नेतृत्वको ‘नेशनल डेमोक्रेटिक पार्टी’ तेस्रो हुने अनुमान छ । बाँकि ‘ब्ल्क क्युवेस्वा’, ‘ग्रीन पार्टी अफ क्यानडा’, ‘पिपुल्स पार्टी अफ क्यानडा’, ‘प्रोग्रेसिभ क्यानेडियन पार्टी’ आदिले सीमित सिटमा जित हासिल गर्नेछन् ।
‘सीवीसी न्युज’को पछिल्लो सर्वेक्षणअनुसार, कूल तीन सय ३८ सिटमध्ये कन्जरवेटिभले ३२, लिबरलले ३१ दशलमलव ८ र डेमोक्रेटिकले १८ प्रतिशतमा जित हासिल गर्न सक्नेछन् । अर्थात्, कन्जरवेटिभ र लिबरलबीच कडा प्रतिस्पर्धा छ ।
आप्रवासीको बाहुल्य रहेको क्यानडामा नेपालीभाषीको संख्या भने ४० देखि ५० हजारसम्म रहेको मानिँदै आएको छ । यसमा झापा र मोरङका शिविरबाट तेस्रो देश पुर्नवासमा ल्याइएका भुटानी शरणार्थीसमेत पर्छन् । जसको संख्या नै झण्डै आठ हजार छ ।
यो पनि पढ्नु होला
क्यानडामा भोलि निर्वाचन : फर्केलान् त ट्र्युडो फेरि सत्तामा ?
‘क्यानडामा ४०/५० हजार जति अनुमान गरिए पनि भोट हाल्न योग्य नेपालीभाषी त्यत्रो छैनन्’ लामो समयदेखि टोरन्टो बस्दै आएका एक एनआरएनए अगुवाले सुनाए, ‘नागरिकता लिइसकेका र १८ बर्ष पूरा भएकाले मात्र मतदान गर्न पाउने हुँदा यतै बसे पनि चुनावमा सबै नेपालीभाषीको सहभागिता हुँदैन ।’
संख्या जे जति होस्, क्यानडा बस्ने नेपालीभाषीको मत यसपल्ट पनि बाँडिने देखिएको छ । विगतमा ‘कन्जरवेटिभ पार्टी’प्रति बढी सहानुभूति राख्ने केही नेपालीको मत यसपल्ट ‘लिबरल पार्टी’तिर जाने देखिन्छ । पहिले ‘लिबरल’तिर लागेका केही ‘कन्जरवेटिभ’तिर ढल्किएको पाइन्छ ।
यसमा ‘फोर्डले लछारपाटो लगाएन’ भन्दै कन्जरवेटिभबाट लिबरलतिर लाग्ने पनि छन् । उता, ‘ट्रयुडोले पनि खासै नापेन’ भनेर लिबरलबाट कन्जरवेटिभतिर ढल्किने पनि छन् । यस्ता ‘मुद्दा हेरेर मत हाल्ने’ खालका बाहेक कतै ढुलमुल नगरी एउटै पार्टीलाई मत हाल्नेको संख्या पनि उत्तिकै छ ।
‘नेपालीभाषी भुटानीको मत पनि एउटै पार्टीलाई जाँदैन, लिबरल र कन्जरवेटिभ दुबैतिर बाँडिन्छ’ गुएल्फ निवासी एक अगुवाले नाम उल्लेख नगर्ने गरी भने, ‘कन्जरवेटिभ सरकारको पालामा क्यानडा ल्याइएकाले त्यही पार्टीलाई रुचाउने र आप्रवासीको भलो गर्ने भनिएकाले लिबरल चाहने दुबैथरी भुटानी छन् ।’
‘सीवीसी न्युज’को पछिल्लो सर्वेक्षणअनुसार, कूल तीन सय ३८ सिटमध्ये कन्जरवेटिभले ३२, लिबरलले ३१ दशलमलव ८ र डेमोक्रेटिकले १८ प्रतिशतमा जित हासिल गर्न सक्नेछन् । अर्थात्, कन्जरवेटिभ र लिबरलबीच कडा प्रतिस्पर्धा छ ।
