भारतबाट राजश्व छलेर ल्याइएको चिनी, नेपाली चिनी उद्योगको बोरामा प्याकिङ गरेर बजारमा बिक्री गर्ने धन्दामा संलग्न दुईजनालाई प्रहरीले पक्राउ गरेको छ। पक्राउ पर्नेमा बारा कलैया उपमहानगरपालिका ६ मा रहेको जय हनुमान ट्रेडर्स प्रालिका संचालक रमेश तिवारी र उनका साझेदार दिनेश पाण्डे छन् ।
उनीहरु दुवैजनालाई कलैयामै लुकीछिपि बसिरहेको अवस्थामा शनिबार बेलुकी साँझ पक्राउ गरिएको बाराका प्रहरी उपरीक्षक विकासराज खनालले जानकारी दिए।
कलैया उपहानगरपालिका ६ स्थित मछरहट्टा टोलमा रहेको रामनारायण यादवको घरमा प्रहरीले गत असोज २४ गते छापा मार्दा भारतबाट तस्करी गरी ल्याइएको ३८ वटा बोरामा रहेको १७ क्वीन्टल चिनी बरामद भएको थियो ।
पाण्डे र तिवारीले यादवको घर भाडामा लिएर गोदाममा भण्डारण गरेर राखेको ३८ बोरा चिनीसहित प्रहरीले चिनीको बोरा सिलाउने मेसिन १ थान , बाराको रिलायन्स चिनी उद्योग र सर्लाहीको इन्दु शंकर चिनी उद्योगको नाम, ठेगाना, लोगो र ब्राण्ड छापिएको खाली बोरा २ सय थान बरामद गरेको थियो।
पक्राउ परेका दुवैजनालाई बरामद चिनीसहित राजश्व ऐनअनुसार आवश्यक कारवाहीका लागि राजश्व अनुसन्धान कार्यालय पथलैयामा पठाइएको खनालले बताए ।
