वुमन्स च्याम्पियन्स टि२० लिग(डब्लूसीएल) क्रिकेट प्रतियोगितामा विराटनगर टाइटन्सले लगातार दोस्रो जित हात पारेको छ ।
९५ रनको विजयी लक्ष्य पछ्याएको विराटनगरले १५ ओभरमा ४ विकेट गुमाउँदै पुरा गर्यो । विराटनगरको जितमा लक्ष्मी चौधरीले सर्वाधिक २३ को योगदान दिइन् । कप्तान सिता राना मगरले बोल्ड आउट गर्नुअघि २३ बलमा २ चौका प्रहार गरिन् ।
त्यस्तै अस्मीना कर्मचार्य २१ बलमा २ चौका सहित १६ रनमा अविजित रहिन् ।पोखराका लागि सिता मगरले २ र अनुराधा चौधरीले १ विकेट लिइन्।
यसअघि कीर्तिपुर मैदानमा टस जितेर पहिले ब्याटिङ रोजेको पोखराले २० ओभरमा ५ विकेट गुमाएर ९४ रन मात्र बनाउन सक्यो । उसका लागि कविता कुँवरले सर्वाधिक २२ रन बनाइन् ।
विराटनगरकी सवनम राइले ४ ओभरमा मात्र ८ रन खर्चेर २ विकेट लिदा सोनु खड्काको नाममा १ विकेट रह्यो ।
पहिलो खेलमा विराटनगरले ललितपुर फाल्कोन्सलाई ४ विकेटले पराजित गरेको थियो । विराटनगरले तेस्रो खेलमा शनिवार क्याट क्विन्स काठमाडौंसँग प्रतिस्पर्धा गर्ने छ।
लगातार दोस्रो हारसँगै पोखराको शीर्ष स्थानमा रहेर स्वत फाइनल खेल्ने संभावना झिनो बाँकी रहेको छ । पहिलो खेलमा पोखरा काठमाडौंसँग ८२ रनले पराजित भएको थियो । पोखराले अव तेस्रो खेल सनिवार चितवन राइनोजसँग खेल्ने छ ।
