युएईएफए च्याम्पियन्स लिग फुटबल अन्तर्गत समूह चरणको दोस्रो खेलमा स्पेनिस क्लब बार्सिलोनाले इटालियन क्लब इन्टर मिलानलाई पराजित गरेको छ । गएराती सम्पन्न समूह एफको खेलमा बार्सिलोनाले इन्टर मिलानमाथि २–१ को जित निकालेको हो ।

बार्सिलोनाको जितमा दुवै गोल लुइस स्वरेजले गरेका थिए भने इन्टरका लागि एक गोल लाउतारो मार्टीनेजले गरेका थिए ।

खेलको दोस्रो मिनेटमै गोल गर्दै मार्टीनेजले मिलानको लागि अग्रता दिलाएका थिए । उनको गोल मार्फत नै पहिलो हाफ १–० ले अगाडी रहेको मिनलानले दोस्रो हाफमा २ गोल खायो ।

स्वरेजले खेलको ५८औं मिनेटमा गोल गर्दै खेल बराबरी गरेका थिए भने खेलको निर्णायक गोल खेलको ८४औ मिनेटमा लियोनेल मेसीको असिस्टमा स्वरेजले नै गरेका थिए ।

योसँगै लुइस स्वरेजले सन् २०१६ सेप्टेम्बरदेखि पहिलो पटक च्याम्पियन्स लिगको समुह चरणमा गोल गरेका छन् ।

यो जितपछि एक खेल बराबरी र एक खेलमा जित हात पारेको बार्सिलोनको २ खेलमा ४ अंक भएको छ ।बार्सिलोना अंक तालिकाको दोस्रो स्थानमा छ । त्यस्तै पराजित मिलान एक हार र एक बराबरीसँगै अंक तालिकाको पुछारमा रहेको छ ।

त्यस्तै गएराती नै भएको खेलमा यसै समुहको डोर्टमण्डले स्लाभिया प्राहलाई पराजित गरेपछि २ खेलमा ४ अंक बटुलेर शिर्ष स्थानमा रहेको छ ।