इटालियन सिरी ए फुटबलमा नापोलीले जित निकालेको छ ।आइतबार राति भएको खेलमा नापोलीले ब्रेसियालाई २–१ गोल अन्तरले हराएको हो ।

घरेलु मैदानमा नापोलीलाई जित दिलाउन ड्रिएस मेर्टेन्स र कोस्टास मोनालासले समान एक एक गोल गरे । ब्रेसियाका मारियो बालोटेलीले एक गोल फर्काए ।

खेलको १३ औं मिनेटमा नै घरेलु टोली नापोलीले अग्रता लिएको थियो । उसका लागि मेर्टेन्सले गोल गरे । खेलको ४५ औं मिनेटमा मोनालासले गोल गर्दै अग्रता दोब्बर बनाए । पहिलो हाफ २–० को अग्रता कायम गरेको नापोलीले खेलको ६७ औं मिनेटमा गोल खायो । ब्रेसियाका लागि बालोटेलीले गोल फर्काएपनि जितका लागि प्रयाप्त हुन सकेन ।

जितसँगै नापोली लिगको चौंथो स्थानमा उक्लिएको छ ।नापोलीले ६ खेलमा १२ अंक जोडेको छ । ६ अंक जोडेको ब्रेसिया १४ औं स्थानमा छ ।

इटालियन सिरी ए अन्तर्गत नै अर्को खेलमा एसी मिलान पराजित भएको छ । मिलान फियोरेन्टिनासँग ३–१ ले पराजित भएको हो ।

मिलानको यो चौंथो हार हो । हारसँगै मिलानले ६ खेलमा मात्र ६ अंक जोडेको छ । मिलान लिगको १६ औं स्थानमा छ । नवौं स्थानको फियोरेन्टिनाको ८ अंक छ ।