स्पेनिस ला लिगा फुटबलमा आज (शनिबार) चार खेल हुँदैछ । जसमा साविक विजेता बार्सिलोना, रियल मड्रिड लगायतका ठुला क्लबले प्रतिस्पर्धा गर्ने छन् ।

बार्सिलोनाले गेटाफेसँग उसैको मैदानमा खेल्दैछ । गेटाफे र बार्सिलोनाबीचको खेल नेपाली समय अनुसार ७ः४५ मा सुरु हुनेछ ।

यस सिजन खराब लयबाट गुज्रिरहेको बार्सिलोना कप्तान लियोनल मेस्सीबिना मैदान उत्रने छ । मेस्सी चोटका कारण टिम बाहिर छन् ।

लिगको ६ खेलमा १० अंक जोडेको बार्सिलोना सातौं स्थानमा छ । गेटाफे ७ अंक जोडेर दशौँ स्थानमा छ ।

ला लिगा अन्तर्गत शनिबार राति मड्रिड डर्बी भिडन्त हुँदैछ । लिग लिडर रियल मड्रिड र तेस्रो स्थानको एट्लेटिको मड्रिडबीचको खेल राति १२ः४५ मा सुरु हुनेछ । खेल एट्लेटिकोको मैदानमा हुनेछ ।