अखिल नेपाल फुटबल संघ (एन्फा) का अध्यक्ष कर्मा छिरिङ शेर्पाले केही दिन अगाडि भने ‘हामीले हिलोमा जग बसाउन खोज्यौँ, त्यसैले समस्या भयो।’ अर्थात् उनको अभियव्यक्ति सहानुभूतिको महसुस गर्दै गरिएको जस्तो देखिन्थ्यो। पछिल्लो समय उनीविरुद्ध पनि प्रहार सुरु भएपछि रक्षात्मक बन्ने प्रयास स्वरूप उनले यसो भनेका थिए। यो भनाइले उनको रक्षा गर्नेभन्दा पनि क्षमता र प्रवृत्तिमा शङ्का उत्पन्न गर्ने काम गरेको छ।

एन्फाको निर्वाचन दौरान पनि शेर्पाले तयार पारेको टिम र निर्वाचन जित्न गरेका हत्कण्डाले परिवर्तन नदेखिने संकेत गरेको थियो। आज ती विषय क्रमशः पुष्टि हुँदैछन्।

गणेश थापा नामक ‘खराब कारखाना’बाट उत्पादितहरूले नै अहिले एन्फामा राज गरिरहेका छन्। शेर्पाकै कुरा गर्ने हो भने पनि उनी समेत लामो समय थापासँग सहकार्य गरेकै व्यक्ति हुन। थापाको राज सकिएपछि एन्फामा परिवर्तनको अपेक्षा गर्नेहरू नभएका हैनन्। अपेक्षा गर्नु राम्रै पनि हो। तर, थापा कारखानाका उत्पादनहरूले गर्ने असरबारे सबै बेखबर नै थिए वा थाहा पाएर पनि चुप थिए। सुधारको त्यो चामत्कारिक खुबी कर्मामा थिएन पनि।