काठमाडौं - प्रधानमन्त्री केपी शर्मा ओलीले नेकपाको संसदीय दलको बैठकमा मुलुकको विकास निर्माणका प्रमुख बाधक निर्माण व्यवसायीहरु भएको भन्दै काम नगर्ने ठेकेदारप्रति सरकार कडा रुपमा प्रस्तुत हुने बताएका छन्।
संसदीय दलको मंगलबारको बैठकमा करिब दुई घन्टा बोलेका ओलीले वर्तमान सरकारले गरेका कामको चर्चा गर्दै देशभरका ठेक्कामा ठेकेदारहरुले मुलुकलाई ठगिरहेको बताए। ‘ठेकेदारहरुले काम लिने तर समयमै नसक्ने कारणले सरकार बढी बदनाम भएको छ,’ बैठकमा सहभागी एक नेताले ओलीलाई उद्धृत गर्दै भने, ‘ठेक्का पाएपछि काम गर्ने निहुँमा मोबिलाइजेसन बापत रकम लिने तर काम भने नगर्ने प्रवृत्ति ठेकेदारहरुमा देखिएको छ। यही कारण आयोजनाहरु अधुरा छन्।’
