पूर्वपश्चिम राजमार्गअन्तर्गत राप्ती नगरपालिकाको खहरे पुलमा यात्रुवाहक बस र ईभी गाडी एकआसपमा जुध्दा सात जनाको मृत्यु भएको छ। दुर्घटनामा अन्य १८ जना घाइते भएका छन्।

धनगढीबाट काँकडभिट्टातर्फ गइरहेको प्रदेश१-०१-००१ख ३५८३ नब्बरको यात्रुवाहक बस र मकवानपुरबाट नारायणगढ आइरहेको बागमती प्रदेश ०३-००१ज २९९ नम्बरको विद्युतीय गाडि एकआपसमा ठोक्किएका चितवन प्रहरी प्रमुख गोविन्द पुरीले बताए।

ज्यान गुमाएकामध्ये मकवानपुर हटिया-३ का ५५ वर्षीय सोमप्रसाद रुपाखेती र हेटौंडा-५ की ५३ वर्षीया मैंयाकुमारी न्यौपानेको मात्र पहिचान खुलेको छ।

मृत्यु हुनेमा अधिकांश ईभी गाडिका यात्रु हुनसक्ने प्रहरीको अनुमान छ। मृत्यु हुनेमा एक गर्भवती महिला समेत रहेको प्रहरीले जनाएको छ।

त्यस्तै घाइतेमध्ये ८ जनाको पुरानो मेडिकल कलेज र बाँकी १० जना घाइतेको नयाँ मेडिकल कलेज भरतपुरमा उपचार भइरहेको प्रहरीले जनाएको छ। सबै घाइतेहरू खतरामुक्त रहेको पनि प्रहरीले जनाएको छ।