शुक्रबार बिहानै कार्यबाहक प्रधानमन्त्री प्रकाशमान सिंहले आन्दोलनरत शिक्षकहरूलाई एउटा सन्देश पठाए- ‘सरकार तपाईंहरूसँग वार्ता गर्न चाहन्छ, प्रतिनिधिहरू सिंहदरबार आउनुहोला…।’
त्यसका लागि कार्यबाहक प्रधानमन्त्री सिंह भने शिक्षा विज्ञान तथा प्रविधिमन्त्री विद्या भट्टराई, संसदको प्रमुख सचेतक, दलका मुख्य सचेतकहरुसहित कुरिरहेका थिए। दिउँसो तीन बजेदेखि मन्त्रीहरू शिक्षक प्रतिनिधि आउलान् भनेर कुरिरहेका थिए।
तर शिक्षकहरू आउँदै आएनन्। यता मन्त्रिहरू कुरिरहँदा आन्दोलनरत शिक्षकहरू भने बानेश्वरको सडक भजन र देउडा गाउँदै नाचिरहेका थिए।
डेढ घण्टा कुर्दा समेत शिक्षक महासंघ एवम शिक्षक प्रतिनिधिहरुको अनुपस्थित भएपछि सरकारसँगको वार्ता स्थगित भएको शिक्षामन्त्री भट्टाईले जानकारी दिइन्।
‘सरकार लचिलो भएर प्रस्तुत भइरहेको छ। शिक्षकका मागहरुलाई दृढताकासाथ सम्बोधन गरेर अगाडि बढिरहेको छ। मन्त्रालय मात्र नभइ सिंगो सरकार, संसदको प्रमुख सचेतक, दलका मुख्य सचेतकहरुसहितको उपस्थितिमा आह्वान गरेको थियौं तर उहाँहरु आउनुभएन। औपचारिक खबर पनि आएन। करिब डेढ घण्टा पर्खेका हौं । उहाँहरु नआएपछि आजको बैठक स्थगित गराएका छौं।’
उनले शिक्षक महासंघ, शिक्षक प्रतिनिधिहरु सबैलाई आफैले फोन गरेर साथै मन्त्रालयबाट औपचारिक रुपमा पत्रचारसमेत गर्दा पनि वार्तामा उपस्थित नभएको बताइन्।
‘मैले शिक्षक महासंघ, शिक्षक प्रतिनिधिहरु सबैलाई आफैंले फोन गरें र आमन्त्रण गरें। उहाँहरुलाई फोन गरेर आमन्त्रण गरेपछि अनौपचारिक भयो भनेर हामीले मन्त्रालयको तर्फबाट एउटा पत्र पठाऔं। सबैलाई तीन बजे उपस्थित हुन भनेका हौं। वार्ताका लागि मन्त्रालय सँधै खुला छ भनेर सार्वजनिक आह्वान पनि गर्यौं’ उनले भनिन्।
विद्यालय शिक्षा ऐन जारी गर्न माग गर्दै वार्षिक परीक्षाहरूसमेत छोडेर शिक्षकहरू सडकमा आएका थिए। महिनादिनदेखि आन्दोलनरत उनीहरूले यसअघि पार्टी कार्यालयहरूमा धर्नासमेत दिएका थिए।
सबै परीक्षा सकिएपछि देशभरिका थप शिक्षकहरू २० गतेदेखि राजधानी आएका छन्।
यसअघि पनि सरकारले वार्तामा बोलाएको थियो। तर उनीहरूले वार्ताको औचित्य सकिएको भन्दै ऐन जारी गर्न सरकारलाई जवाफ फर्काएका थिए।
