प्रधानमन्त्री केपी शर्मा ओली र भारतका प्रधानमन्त्री नरेन्द्र मोदीबीच थाइल्याण्डको बैड्ककमा भेटवार्ता भएको छ।
बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिम्स्टेक)को छैटौँ शिखर सम्मेलन सकिएपछि उनीहरूबीच भेटवार्ता भएको हो।
प्रधानमन्त्री भएपछि अहिलेसम्म ओलीलाई दिल्लीले निम्ताे दिएकाे छैन। यसअघि अमेरिकाको न्युयोर्कमा राष्ट्रसंघ महासभामा पनि मोदीसँग ओलीले साइडलाइनमा भेटेका थिए।
000
गृहमन्त्री रमेश लेखकले चैत १५ गतेको प्रदर्शनमा सुरक्षाकर्मी निकै संयम र धैर्यताका साथ प्रस्तुत भएको बताएका छन्।
राज्य व्यवस्था समितिले शुक्रबार गरेकाे बैठकमा बाेल्दै उनले सुरक्षाकर्मीको संयमताले नै सम्भावित ठूलो क्षति हुनबाट जोगिएको बताएका हुन्।
राजीवादीले गरेकाे आन्दोलन नभएर अराजक र उदण्डहरूको भीडमात्रै भएको उनकाे दाबी थियाे।
000
नेपाल विद्युत प्राधिकरणका निर्वतमान कार्यकारी निर्देशक कुलमान घिसिङले बक्यौता असुली गर्ने आफ्नो प्रयास नै पदबाट हट्नुपर्ने मुख्य कारण बनेको बताएका छन्।
शुक्रबार काठमाडौंमा पत्रकार सम्मेलन गर्दै उनले प्राधिकरणले चार पटकसम्म लाइन बिच्छेद तथा अन्य विकल्प समेत अवलम्बनगरी बक्यौता असुलीको प्रयास गर्दा माथिल्लो निकायबाट नै अवरोध सृजना भएको बताएका हुन्।
उनले लाइन बिच्छेदगरी बक्यौता असुली गर्ने सहमतिको लागि आफूले विद्युत नियमन आयोगलाई पत्रचार गर्ने बित्तिकै पदबाट हटाउने निर्णय भएको उनले बताएका थिए।
000
नेपाल प्रहरीका प्रहरी महानिरीक्षक दिपक थापाले राजावादीले गरेकाे प्रदर्शनमा म्याद नाघेको अश्रुग्यास प्रहार नभएको दाबी गरेका छन्।
शुक्रबार राज्यव्यवस्था तथा सुशासन समितिको बैठकमा सांसदहरूले सोधेका प्रश्नको जवाफ दिँदै आईजीपी थापाले म्याद गुज्रिएका अश्रुग्यास प्रयोग नभएको दाबी गरेका हुन्।
म्याद नाघेका अश्रुग्यास नष्ट गरिने उनकाे भनाइ थियाे।
000
नेपाल शिक्षक महासंघले सरकारले बोलाएको वार्तामा बस्न अस्वीकार गरेको छ।
वार्ताका लागि सिंहदरबारमा बोलाए पनि महासंघ वार्तामा उपस्थित नभएपछि शुक्रबार शिक्षकसँग छलफल गर्ने सरकारको प्रयास असफल भएको हाे।
शिक्षकहरूसंग छलफल गर्नका लागि फोनका साथै औपचारिक पत्र पठाए पनि महासंघ वार्तामा उपस्थित नभएको शिक्षामन्त्री विद्या भट्टराईले बताइन्।
000
काठमाडौंको तीनकुनेमा अबदेखि कुनै पनि कार्यक्रम गर्न अनुमति नदिन प्रधानमन्त्री तथा मन्त्रिपरिषद कार्यालय र गृह मन्त्रालयलाई संसदीय समितिले निर्देशन दिएको छ।
शुक्रबार बसेको प्रतिनिधि सभा अन्तर्गतको राज्य व्यवस्था तथा सुशासन समितिको बैठकको निर्णय सुनाउँदै सभापति रामहरी खतिवडाले यस्तो निर्देशन दिएका हुन्।
त्यस्तै चैत्र १५ गतेको घटनाको सत्यतथ्य छानविन गरी प्रत्यक्ष र अप्रत्यक्ष रुपमा संलग्न रहेकालाई आवश्यक छानविन गरी कानुनी कारबाहीलाई अघि बढाउन पनि उनकाे निर्देशक छ।
000
जनमत पार्टीले अनुशासन समिति संयोजकसमेत रहेका पार्टी उपाध्यक्ष दीपककुमार साहलाई निलम्बन गरेको छ।
सुनसरीका साहलाई ६ महिनाका लागि पार्टीबाट निलम्बन गरिएको जनमत पार्टीले जनाएको छ।
फागुन २१ गते उपाध्यक्ष साहलाई पार्टी अनुशासन समितिले स्पष्टीकरण सोधेको थियो। उनले फागुन २७ गते बुझाएको स्पष्टीकरण चित्तबुझ्दो नभएको भन्दै ६ महिनाका लागि निलम्बन गरिएको अनुशासन समितिको भनाइ छ।
000
बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिमस्टेक)को छैटौँ शिखरका बेला म्यान्मारका सैनिक शासक मिन ओङले विभिन्न राष्ट्रका सरकार प्रमुखहरूलाई भेटेका छन्।
‘क्रूर सैनिक शासक’का रुपमा चिनिएका उनले नेपालका प्रधानमन्त्री केपी शर्मा ओली तथा भारतीय प्रधानमन्त्री नरेन्द्र मोदीलगायत बिमस्टेकका सदस्य राष्ट्रका सरकार प्रमुखहरूलाई भेटेका हुन्।
तर उनको ब्यापक आलोचना भइरहेको छ।
000
दक्षिण कोरियाका राष्ट्रपति युन सुक योलमाथिको महाभियोग संवैधानिक अदालतले पनि सदर गरेको छ। यससँगै उनी पदमा फर्किने बाटो बन्द भएको छ।
संवैधानिक अदालतले सर्वसम्मतिले संसदबाट पारित भएको महाभियोगलाई अनुमोदन गर्दै उनलाई पदच्युत गरिदिएको हो।
उनले उत्तर कोरियाबाट खतरा र राजनीतिक गतिरोधलाई कारण देखाउँदै मार्शल ल लागू गरेपछि विरोध भएको थियो। त्यसकै कारण उनीमाथि महाअभियोग लगाइएको थियो।
