प्रमुख प्रशासकीय अधिकृतलाई कार्यकक्ष लैजान उपमेयर सुनिता डङ्गोल महानगर प्रहरीसँग भिडिरहँदा बिहीबार काठमाडौं महानगरका प्रमुख बालेन शाह भने पाँचखालमा लस्सी पिइरहेका थिए।
काठमाडौं महानगरको प्रमुखका रुपमा चुनाव जितेर आउँदा बालेनको चर्चा जति थियो, त्यसपछि उनी त्यत्तिकै विवादमा पनि मुछिंदै आए।
‘राजा’कै शैलीमा महानगर हाँक्न कस्सिएका बालेनसँग सुरुवातदेखि नै न त्यहाँका कर्मचारीहरूको लय मिल्यो न यहाँका वडाअध्यक्षहरूसँग नै।
विकासका कामहरूमा वडाध्यक्षहरूले नै बालेनलाई पटक पटक र्याखर्याख्ती पारे। ऐनकानुनअनुसार प्रमुख प्रशासकीय अधिकृतको मातहतमा हुने नगरप्रहरीलाई बालेनले आफ्नै ‘सुरक्षादस्ता’ जसरी प्रयोग गर्दै आए।
उनका पालामा कुनै पनि प्रमुख प्रशासकीय अधिकृतहरू टिक्न सकेनन्। अहिलेसम्म चार जना अधिकृत फेरिइसकेका छन्।
एकजना प्रमुख प्रशासकीय अधिकृत सरोज गुरागाईंलाई उनले गत पुसमा निलम्बन गरेका थिए।
बिना कुनै आधार आफ्नोमात्रै एकल निर्णयमा गुरागाईंमाथि उनले भ्रष्टाचारको आरोप लगाउँदै निलम्बन गरेपछि लगभग १०३ दिनसम्म महानगर प्रमुख प्रशासकीयबिहीन भयो।
महानगरका कामहरू सबै प्रभावति हुन थालेपछि अरु जनप्रतिनिधिहरूको दबावमा उपमेयर सुनिता उनलाई पुनर्बहाली गर्न आफै अघि सरिन्। तर उनलाई बालेनका नगरप्रहरीले छेके। धकेलाधकेल भयो। सुनिताले उपमेयरप्रति पनि उत्तरदायी हुनू भन्दै नगरप्रहरी ऐन कानुनका कुरा पनि सुनाइन्।
अन्तत: प्रमुख प्रशासकीय अधिकृतको ढोकामा बालेनले लगाइदिएको ताला फोडेर उनलाई हाजिर गराइन्।
यसपछि बालेनको सचिवालयले सुनितामाथि ‘एमालेको उक्साहट’ भएको आरोप लगायो। सुनिता नेकपा एमालेको उम्मेदवारका रुपमा महानगरको उपमेयर भएकी हुन्।
एमालेसँग बालेन भने सुरुवातदेखि नै भिड्दै आएका छन्। पटक पटक फेसबुकमा ‘जे पायो त्यही’ लेख्ने आरोप खेपेका बालेनले चैत १५ गते राजावादीको आन्दोलनपछि पूर्वराजा ज्ञानेन्द्रलाई जरिवाना पत्र काटेपछि झन् विवादमा तानिए।
कहिले ‘सिंहदरबार जलाइदिन्छु’ भन्ने अनि ‘कहिले मलाई जेल हाल’ भनेर चुनौती दिने बालेनका अधिकांश अभिव्यक्तिहरू विवादित नै छन्।
बिनाकुनै आधार प्रशासकीय अधिकृतलाई निकालेर उनको कार्यकक्षमा आफैले ताला लगाइदिएका मेयर बालेनले भने सरकारलाई नयाँ अधिकृत पठाउन धम्की दिइरहेका थिए।
केही दिनअघिमात्रै उनले प्रशासकीय अधिकृत नपठाए ‘सबैलाई टुकुचारमा गाड्ने’ सम्मका धम्की दिएका थिए। पालिकाहरूमा प्रमुख प्रशासकीय अधिकृतहरू संघीय सरकारले नै पदस्थापन गर्छ।
महानगरमा प्रमुख कार्यकारी नहुँदा त्यहाँका कर्मचारीहरूले पाँच महिनादेखि तलव खान पाएका छैनन्। कार्यसम्पादन मुल्याङ्कनमा समेत निकै पछि परेको महानगरले अहिलेसम्म ५० प्रतिशत पनि विकास खर्च गर्न सकेको छैन।
उपमेयर डङ्गोलले बालेनले निलम्बन गरेका प्रमुख प्रशासकीयलाई ढोकै फोडेर भित्र लगिन् र कामको जिम्मेवारी दिएकी छन्।
उनले मेयर बालेनलाई कोठमा बसेर निर्देशन नदिन र तत्काल बोर्ड र नगरसभाको बैठक राख्न पनि चेतावनी दिएकी छिन्।
