राष्ट्रिय स्वतन्त्र पार्टी (रास्वपा) का सभापति रवि लामिछानेको सांसद पद स्वत: निलम्बनमा परेकाे छ।
आइतबार जिल्ला अदालत कास्कीमा उनीविरुद्ध सम्पत्ति शुद्धीकरण ऐनअनुसार मुद्धा दर्ता भएपछि लामिछानेकाे सांसद पद स्वत: निलम्बनमा परेकाे हाे।
सम्पत्ति शुद्धीकरण (मनी लाउण्डरिङ) निवारण ऐन, २०६४ (संशोधनसहित)को दफा (२७) मा कुनै व्यक्तिमाथि सम्पत्ति शुद्धीकरणमा मुद्धा दर्ता भएमा उसकाे पद स्वत: निलम्बन हुने व्यवस्था छ।
‘प्रचलित कानुन बमोजिम स्थापित संगठित संस्थाको कुनै पदाधिकारी वा कर्मचारी वा कुनै राष्ट्र सेवक यस ऐन बमोजिम थुनामा रहेकोमा त्यसरी थुनामा रहेको अवधिभर र निज उपर दफा २२ बमोजिम मुद्दा दायर भएकोमा सो मुद्दाको किनारा नभएसम्म त्यस्तो कर्मचारी, पदाधिकारी वा राष्ट्र सेवक स्वतः निलम्बन भएको मानिनेछ,’ ऐनमा भनिएको छ।
जिल्ला सरकारी वकिलको कार्यालय कास्कीले पूर्वगृहमन्त्रीसमेत रहेका लामिछानेमाथि २७ करोड ८९ लाख ४४ हजार ७०५ रुपैयाँ गैरकानुनी रुपमा आर्जन गरेको आरोपसहित अदालतमा मुद्धा दर्ता गरेकाे छ।
