दाङमा बसकाे ठक्करबाट एक जना माेटरसाइकल चालककाे मृत्यु भएकाे छ। मृत्यु हुनेमा घोराही उपमहानगरपालिका १० का ४४ वर्षीय दिलिप केसी रहेका छन्।
शुक्रबार दिउँसाे साढे तीन बजे तुलसीपुरबाट घोराहीतर्फ आउँदै गरेको रा १ ख ८१६ नम्बरकाे बसले तुलसीपुरतिर जाँदै गरेको रा ५ प ६६५४ नम्बरकाे मोटरसाइकललाई ठक्कर दिएकाे थियाे।
घोराही-१० गुर्जेखोलामा माेटरसाइकललाई ठक्कर दिँदा बस सडकमै पल्टिएकाे थियाे। बस पल्टिदा बसमा सवार ११ जना घाइते भएकाे जिल्ला प्रहरी कार्यालय दाङका प्रहरी नायव उपरीक्षक डिएसपी इश्वर थापाले जानकारी दिए।
घाइतेहरूकाे राप्ती स्वास्थ्य विज्ञान प्रतिष्ठान घोराहीमा उपचार भइरहेको छ।
