नेपाली चलचित्र ‘सोल्टिनी’मा तक्मे बुढाको नामले परिचित कलाकार विल्सन विक्रम राई अनुबन्धित भएका छन्। राईको प्रवेशसँगै यस चलचित्रको कलाकार टिम अझै बलियो बनेको छ।
चलचित्रमा राईको भूमिकाबारे अहिले नै खुलाइएको छैन। यसअघि नै चलचित्रमा प्रकाश सपूत र परीक्षा लिम्बुले मुख्य भूमिका निभाउने घोषणा भइसकेको थियो। सपूतले ’भीमसेन पोखरेल’ र लिम्बुले ’दिलासा राई’को भूमिका निभाउनेछन्।
‘सोल्टिनी’ भोजपुरको कुनै गाउँमा आधारित रहनेछ। चलचित्रका निर्देशक अर्जुन सुवेदीका अनुसार यसमा समाजमा विद्यमान अमानवीयता र जातीय भेदभावलाई उजागर गर्दै यस विरुद्ध आवाज उठाउने कथा तथा दुई प्रमुख पात्रको अपुरो प्रेमको कथा रहनेछ।
