काठमाडौँको कीर्तिपुर नगरपालिकाको मेयरमा काँग्रेसका कृष्णमान डंगोल निर्वाचित भएका छन्। सोमबार राती ९ बजे सार्वजनिक अन्तिम मतपरिणामअनुसार डंगोलले ५ हजार ३३४ मत प्राप्त गर्दै नगरप्रमुखमा विजयी प्राप्त गरे।
डंगोलका मुख्य प्रतिद्वन्द्वी नेकपा माओवादी केन्द्रका प्रा.डा.शिवशरण महर्जनले ४ हजार ५५५ मत प्राप्त गर्दै दोस्रो भए। यस्तै नेकपा एमालेका सुरेन्द्र मानन्धरले ४ हजार ३३७ मत प्राप्त गर्दै तेस्रो भए।
स्वतन्त्र उम्मेदवार राजमान महर्जनले १ हजार ३१४ मत प्राप्त गरे। कीर्तिपुरको मेयरका लागि २० जना प्रतिष्पर्धामा थिए।
२०७९ को स्थानीय तहको निर्वाचनमा पनि कीर्तिपुरमा काँग्रेसले नै जितेको थियो। त्यतिबेला नेपाली काँग्रेसका राजकुमार नकर्मी निर्वाचित भएका थिए।
तत्कालीन मेयर नकर्मीको गत साउन १० गते राति मृत्यु भएको थियो। त्यसपछि यहाँ उपनिर्वाचन भएको हो।
.jpg)
