दाङको घोराही उपमहानगरपालिका १० झारबैरा चोक नजिककै टिपरको ठक्करबाट मोटरसाइकलमा सवार एक जनाको मृत्यु भएको छ भने अर्का एक जना घाइते भएका छन्।

मृत्यु हुनेमा तुलसीपुर उपमहानगरपालिका १९ कुटीचौरका १९ वर्षीय सुदीप बुढाथोकी रहेका छन्। उनको राप्ती स्वास्थ्य विज्ञान प्रतिष्ठानमा उपचारका क्रममा मृत्यु भएको जिल्ला प्रहरी कार्यालय दाङले जानकारी दिएको छ। 

बुढाथोकी मोटरसाइक चालक हुन्। दुर्घटनामा परी मोटरसाइकलमा सवार तुलसीपुर १७ का २२ वर्षीय दीपक बस्नेत रहेका छन्। उनको दाहिने खुट्टा र बाँया हातको औँलामा चोट लागेको छ। 

बस्नेतको प्रतिष्ठानमै उपचार भइरहेको छ। दुर्घटना अघि साँझ पौने सात बजे भएको हो। घोराहीबाट तुलसीपुरतर्फ जाँदै गरेको रा १ ख १२९१ नम्बरको टिप्परले सोही दिशातिर गइरहेको गरेको रा ७ प ७४६ नम्बरको मोटरसाइकललाई ठक्कर दिएको थियो। 

प्रहरीले ठक्कर दिने टिप्पर चालक ४० वर्षीय जित बहादुर चौधरीलाई नियन्त्रणमा लिएको छ।