दैलेखको महावु गाउँपालिका अध्यक्षमा नेकपा एमालेका जङ्गबहादुर शाही विजयी भएका छन्। शाहीले ३ हजार १२७ मत प्राप्त गरी विजयी भएका हुन्।
उनका निकटतम प्रतिस्पर्धी नेपाली काँग्रेसका झलक भण्डारीले २ हजार ६७५ मत प्राप्त गरे। यस्तै माओवादी केन्द्रका जङ्ग बहादुर बराल मगरले ८४२, राष्ट्रिय स्वतन्त्र पार्टीका प्रकाश कुमार बुढाले ११२ मत प्राप्त गरे।
महावु गाउँपालिकामा १२ हजार ६१४ मतदाता रहेकोमा छ हजार ९८९ मत खसेको थियो।
पालिका अध्यक्षमा निर्वाचित शाही उपनिर्वाचनको केही समयअघि नेकपा एमाले भएका थिए। उनी २०७९ को निर्वाचनमा नेकपा एकीकृत समाजवादीबाट उम्मेदवार भएर यही पालिका अध्यक्षमा पराजित भएका थिए।
उपनिर्वाचनअघि एमालेमा प्रवेश गरेर शाही फेरि अध्यक्ष बनेका छन्। ०७४ सालको स्थानीय तहको निर्वाचनमा उनी एमालेबाट सोही पालिकामा अध्यक्ष बनेका थिए।
पार्टी विभाजनपछि एकीकृत समाजवादीतिर लागेर जिल्ला अध्यक्ष भएका उनी फेरि एमाले बनेका हुन्। यस पालिकामा नेकपा एसबाट पालिका अध्यक्षमा उम्मेदवार रहेका जगतबहादुर हमालले ४ मत मात्र प्राप्त गरेका छन्।
.jpg)
