नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले मधेश प्रदेश पुगेर संविधानको रक्षा र कार्यान्वयनका लागि जनताको साथ चाहिने बताएका छन्।

मंगलबार मिचैया नगर समिति सिरहामा कार्यकर्तासँग भेटघाट गर्दै उनले जनताको साथबिना संविधानको रक्षा गर्न नसकिने बताए। आफू प्रतिपक्षमा भए पनि उनले जनताको साथ भयो भने संविधान रक्षाका लागि लड्न तयार भएको बताए।

‘संघीयतासहित समावेशी र समानुपातिक प्रतिनिधित्वको सिद्धान्तले सयौं वर्षदेखि उत्पीडनमा परेका जनतालाई अधिकार सम्पन्न बनाएको छ, अब यसको पूर्ण कार्यान्वयनमार्फत जनताको अवस्था बदल्ने बेला आएको छ, यसमा जनताको साथ सहयोग अपरिहार्य छ’, प्रचण्डले भने।

पूर्व प्रधानमन्त्रीसमेत रहेका उनले पछिल्लो समय संविधानले स्थापित गरेका जनताका अधिकार कुण्ठित गर्ने चेष्टा भइरहेको पनि बताए।