संयुक्त राष्ट्रसंघका महासचिव एन्टोनियो गुटेरेसले शुक्रबार गाजाको रफाहमा इजरायली स्थल आक्रमणले ‘ठूलो मानवीय विपत्ति’ निम्त्याउने चेतावनी दिएका छन्। कुनै सम्झौताबिना वार्ताकारहरूले कायरोमा युद्धविराम वार्ता छाडेपछि उनले त्यस्तो चेतावनी दिएका हुन्।
'रफाहमा भएको ठूलो स्थल आक्रमणले ठूलो मानवीय विपत्ति निम्त्याउने छ र अनिकालका कारण मानिसहरूलाई सहयोग गर्ने हाम्रो प्रयासलाई रोक्नेछ,' नैरोबीको भ्रमणका क्रममा गुटेरेसले भने। उनले दक्षिणी गाजा शहरको अवस्था अहिले ‘तरबारको धार’मा रहेको पनि बताए।
युद्धविरामका लागि आफ्नो आह्वानलाई दोहोर्याउँदै उनले भने, 'हामी रफाह र केरेम शालोम क्रसिङमार्फत अत्यावश्यक इन्धनसहित जीवनरक्षक आपूर्तिको प्रवेशलाई पुनः शुरू गर्न संलग्न सबै सक्रिय रूपमा सहभागी छौँ।'
अमेरिकी राष्ट्रपति जो बाइडेनले एक अन्तरवार्तामा यदि रफाह शहरमा पूर्णस्तरको आक्रमण भए इजरायलका लागि हतियार रोकिने चेतावनी दिएका थियो। यसपछि पनि एएफपीका पत्रकारहरूले रफाहमा हमला भएको बताएका छन्।
व्यापक अन्तर्राष्ट्रिय विरोधका बाबजुद इजरायली सेनाले मंगलबार हमास लडाकुहरूको खोजीमा रफाहको पूर्वी क्षेत्रमा प्रवेश गरेको बताएको थियो।
