युनुस अन्सारी हत्या प्रयासको आरोपमा पक्राउ मनमित सिंह भाटिया नै यस्ता हत्या शृङ्खलामा पक्राउ परेका पहिलो भारतीय सुटर थिए। उनीबाट युनुस हत्या प्रयासको रणनीतिकार मात्रै हैन त्यसभन्दा अगाडि भएका जमिम शाह लगायतकाले हत्या घटनाबारे पनि खुलाउन सकिन्छ कि भन्ने हाम्रो आस थियो।
किनकि उसको कनट्र्याक्ट किलरको पृष्ठभूमि, केही समय नेपालमै बसेर ग्यालेक्सी स्कुलमा पढेको अनि नेपाली भाषा र संस्कृतिबारे उ राम्रो जानकार थियो। अर्को महत्त्वपूर्ण पक्ष के भने त्यो जमिम शाहको हत्यामा होस् या शौकत बेग अनि मजिद मनिहारको हत्यामा होस् त्यसमा संलग्नहरू पक्राउ नपरे पनि उनीहरूको सम्बन्ध कुनै न कुनै रूपमा भारतको उत्तर प्रदेश अझ ठ्याक्कै ठाउँ नै भन्दा लखनउ जोडिइरहेको थियो।
