निरंकुश राणा शासनको समुल अन्त्य गदै प्रारम्भमा बहुदलीय प्रजातन्त्र र अन्ततः सर्वहारा वर्गको अधिनायकत्वको समाजवादी राज्य व्यवस्था स्थापना गर्ने महान् संकल्पका साथ वि.सं. २००६ सालमा नेकपा स्थापना भएको थियो।
त्यही नेकपाकै जगमा खडा भएको नेपाली कम्युनिस्ट आन्दोलनको मूलधारका रूपमा वि.सं.२०४७ मा स्थापित नेकपा (एमाले) ले सामन्तवादको मूल नाइके राजतन्त्रको समूल अन्त्य गर्ने र शान्तिपूर्ण तथा वैधानिकरूपमै समाजवादी व्यवस्था स्थापना गर्ने स्पष्ट राजनीतिक दृष्टिकोण बोकेको थियो। नेकपा (एमाले) कै उक्त अजेन्डा र नेतृत्वमा राजतन्त्र अन्त्य भइसकेको छ भने समाजवादी राज्यसत्ताको आधारका रूपमा समाजवादोन्मुख लोकतान्त्रिक गणतन्त्र वैधानिकरूपमै स्थापना हुन पुगेको छ।
एमालेले परिकल्पना गरेअनुरूपको समाजवादी व्यवस्थाको स्थापना अलि टाढा देखिए पनि राजनीतिक कोर्स भने त्यही दिशातर्फ अघि बढिरहेको छ। पाँचौँ महाधिवेशनले जनताको बहुदलीय जनवादलाई पार्टीको कार्यक्रम र नवौँ महाधिवेशनबाट सिद्धान्तकै रूपमा विकास गरेदेखि वर्तमानसम्म आइपुग्दा अनेकौँ आरोह–अवरोहबीच देशको मुख्य राजनीतिक शक्तिका रूपमा स्थापित हुन पुगेको स्पष्टै छ।
