‘डियर प्रधानमन्त्री, तपाईं पढेको कलेज पुनर्निर्माण कहिले?’ लेखिएको ब्यानर बोकेर विद्यार्थीहरु २०७८ भदौ २० गते त्रिचन्द्र कलेजमा भेला भएका थिए। उनीहरुको एउटै माग थियो : घण्टाघरसमेत रहेको कलेजको भवन पुनर्निर्माण वा जीर्णोद्धार।

२०७२ साल बैशाख १२ गतेको भूकम्पले सो खण्ड चर्कियो। केही समय भवनमा कक्षाहरु भए। तर, जब बर्खा लाग्यो भवनबाट पानी चुहिन थाल्यो। कक्षाकोठामा पढ्न असुरक्षित भएपछि त्यहाँ भइरहेको कक्षालाई पारीपट्टीको सरस्वती भवन सारियो।

तर, भूकम्प गएको ७ वर्ष भइसक्दा पनि सो भवन पुनर्निर्माण हुन सकेको छैन। भवन थप जीर्ण बनेको छ। पर्खालहरु झाडीले घेरिएका छन्। वर्षाले कक्षा कोठालाई थप मक्काएको छ। कहिलेकाहीँ विद्यार्थीहरु त्यहाँ ‘रिफ्रेस’ हुन पुग्छन् तर भवनको हाल देखेर आजित हुन्छन् पनि।