गत माघ ५ गते अनलाइनमार्फत् जुवा खेलाएको आरोपमा महानगरीय अपराध महाशाखाले एकसाथ १२ जनालाई पक्राउ गर्यो। लगत्तै पक्राउ पर्ने सबैको नाम, उमेर, ठेगाना र तस्बिरसहितका विवरण सार्वजनिक भए।
प्रहरीले उपलब्ध गराएको सोही विवरणमा पक्राउ परेकामध्ये तीनजना १७ वर्ष उमेर समूहका भएको उल्लेख थियो अर्थात् कानुनको वर्गीकरणअनुसार उनीहरू नाबालिग थिए।
नेपाल प्रहरीले गत माघ महिनामा मात्र तीन जनालाई क्रिप्टोकरेन्सी कारोबार गरेको आरोपमा पक्राउ गरेको नेपाल प्रहरीको तथ्याङ्कले देखाउँछ।
एक महिनाको अन्तरालमा विभिन्न क्षेत्रबाट पक्राउ परेका ती व्यक्तिहरूको समेत व्यक्तिगत विवरण र तस्बिरसहित सार्वजनिक गरियो।
अनुसन्धान अगाडि बढ्नुअघि नै सम्बन्धितको व्यक्तिगत विवरण सार्वजनिक गर्ने यस कार्यले मानिसको गोपनीयताको हक हनन गरिरहेको विज्ञहरू बताउँछन्।
"अनावश्यक रूपमा कसैको व्यक्तिगत विवरण सार्वजनिक गर्नु गोपनीयता कायम राख्ने अधिकारको हनन हो," साइबर कानुनसम्बन्धी विज्ञ अधिवक्ता बाबुराम अर्यालले भने।
