‘हाम्रा अछूत कहलाइएका भाइहरूले पनि नेपाल राजभरका शिक्षालयहरूमा अरु जातहरूले सरह शिक्षा पाउने बन्दोबस्त भएको छ। ... हाम्रा हरिजनभाइहरूले कुन कुन शिक्षालयहरूमा पढ्न चाहनुहुन्छ खोलाइ ती शिक्षालयहरूका प्रधानअध्यापकहरूकहाँ आवेदनपत्र दिनुहोला। त्यस्ता आवेदन पत्रहरू आएपछि जाँची लायक ठहरिएको कक्षामा भर्ना गरी पढाउने बन्दोबस्त हुनेछ।’
नेपाल सरकारले १५ असोज २००८ को नेपाल गजेटमा यो सूचना निकाल्यो। त्यसको आठ महीनाअघि मुलुकमा प्रजातन्त्र नआउन्जेल ‘अछूत’ जातका मानिसलाई छुन समेत कानूनले रोक लगाएको थियो। उनीहरूलाई छोइछिटो नहाल्नेलाई दण्ड दिइन्थ्यो।
