जातीय विभेदको रापले नेपालदेखि अमेरिकासम्म आहत भएपछि प्रेम परियारले अमेरिकी विश्वविद्यालयमा गरेको पहलकदमीले नीतिगत परिवर्तन गराउँदै जातीय असमानताको मुद्दालाई अन्तर्राष्ट्रियकरण गरिदिएको छ।
जातको आधारमा भेदभाव, छुवाछूत र हिंसाको अमानवीय व्यवहार नेपाल सहित दक्षिण एशियाली देशहरूको साझा समस्या हो। यस्तो जातीय विभेद अमेरिकाको क्यालिफोर्निया स्टेट युनिभर्सिटीमा पुगेर विस्फोट भएको छ। जसले अमेरिकी विश्वविद्यालयहरूमा जात-प्रथाबारे बहस हुने गरी तरंग ल्याइदिएको छ। यसको अर्थ हो, अमेरिकामा छालाको रङको आधारमा मात्र हैन, जातको आधारमा पनि विभेद भइरहेको छ, त्यो पनि पठित जमात रहेको विश्वविद्यालयमै भइरहेको छ।
