न्यायपालिका शुद्धीकरण र अदालतहरूमा हुने विसङ्गति अन्त्यको माग गर्दै कानुन व्यवसायीहरूले आन्दोलन थालेको एक महिना पुग्यो । कात्तिक ७ गतेदेखि औपचारिकरुपमा आन्दोलनको सुरुवात गरेको नेपाल बार एसोसिएसन यतिबेला प्रधानन्यायाधीशको राजीनामालाई एकसुत्रीय माग बनाउँदै अगाडि बढेको छ ।
प्रधानन्यायाधीश चोलेन्द्र शमशेर जबराकै कारण न्यायपालिकामा विसङ्गति र बिचौलियाको बिगबिगी भएको तथा भ्रष्टाचार बढेको भन्दै नेपाल बार एसोसिएसनले प्रधानन्यायाधीश जबराको बहिर्गमनलाई नै मुख्य एजेण्डा बनाएको छ ।
तर, प्रधानन्यायाधीश जबराले कसैले माग्दैमा आफूले राजीनामा नदिने, आफू जुन बाटोबाट आएको हो (संसदीय सुनुवाइ) त्यही बाटोबाट मात्रै बिदा हुने (महाअभियोग) बताएपछि यतिबेला नेपाल बार र प्रधानन्यायाधीशबीच द्वन्द्व झनै बढेर गएको छ ।
