नेपाली वायुसेवा प्रदायकले प्रादेशिक उडान गर्दै व्यवसाय विस्तार गर्न थालेका छन्।
निजी क्षेत्रबाट सञ्चालित हवाइ सेवा कम्पनीले मुख्य सहर जाेड्ने गरी प्रादेशिक उडानमा प्रतिस्पर्धा गर्नलागेका हुन्।
कम्पनीहरुले पोखरालाई आधार मानी अधिकांश सहरमा उडान सुरु गरेका छन्। पोखराबाट दैनिक नेपालगञ्ज, भरतपुर, विराटनगर विमानस्थलमा उडान भइरहेको उनीहरुले जनाएका छन्।
यती एयरलाइन्सले लकडाउनअघि नै पोखरा विमानस्थलबाट भरतपुर र भैरहवा नियमित उडान गरिरहेको थियो। यतीले साना जहाज गुण एयरलाइन्सलाई बिक्री गरेपछि मुख्य सहरबीचको उडान रोकिएको थियो।
तर यात्रुको अत्यधिक माग आएको भन्दै चार्टर्ड उडानको रुपमा पोखरा–नेपालगञ्ज उडान सुरु गर्ने भएको छ। यतीले ट्विनअटर जहाजमार्फत कम्पनीले हप्ताको ३ उडान हुने जनाएको छ।
