लिम्बुवान इतिहासका अध्येता भगिराज इङ्नामको घरमा दसैं नभित्रिएको तीन वर्ष भयो।
झापामा रहेका उनका दिदीबहिनी र दाजुभाइले दसैं मान्न छाडेको त २०४५–४६ सालतिरै हो। उनले भने चटक्कै छाड्न सकेका थिएनन्। तै पनि उनलाई मनमनमा सधैं लाग्थ्यो, 'दसैं हाम्रो चाड होइन।'
हरेकचोटि दसैं मनाउँदा मनमा यस्तो कुरा खेल्न थालेपछि इङ्नामले तीन वर्षअघि दसैं नमनाउने निर्णय गरे। परिवारका ठूलादेखि साना सदस्य सबैलाई भेला गरेर उनले भने, 'दसैं हाम्रो चाड होइन।'
इङ्नामजस्ता लिम्बू र अन्य किराँती समुदायले दसैं मान्नु र छाड्नुको कारण लगभग उस्तै छ।
