पूर्वराष्ट्रसेवकको सुविधाबारे सामाजिक सुरक्षा ऐन भन्छ– कि पेन्सन लिनू कि सामाजिक सुरक्षा भत्ता । तर, करिब ११ हजार पूर्वराष्ट्रसेवकले कानुनविपरीत पेन्सन र सामाजिक सुरक्षा भत्ता दुवै लिँदै आएका छन । दोहोरो सुविधा लिनेमा पूर्वनिजामती, पूर्वसुरक्षाकर्मी र पूर्वशिक्षक धेरै छन् ।
राष्ट्रिय परिचयपत्र तथा पञ्जीकरण विभागले हालै गरेको छानबिनपछि दोहोरो सुविधा लिँदै आएकाहरूको सूची तयार गरेको छ । विभागले त्यस्ता दुई हजार चार सय ६६ पूर्वराष्ट्रसेवक कर्मचारीलाई लाभग्राहीको सूचीबाट हटाएको छ । उनीहरूको लगतकट्टा गरेको छ । आठ हजार सात सय ६३ माथि छानबिन अघि बढाएको छ । उनीहरूमध्ये अधिकांशले दोहोरो सुविधा लिइरहेको विभागको भनाइ छ ।
कानुनविपरीत दोहोरो सुविधा लिने ११ हजारलाई लाभग्राहीबाट हटाउँदा महिनामै राज्यको तीन करोड ३० लाख रुपैयाँ बचत हुन्छ, जुन वर्षमा झन्डै ४० करोड हुन आउँछ । दोहोरो सुविधा लिइरहेको रकम उनीहरूले फिर्ता नगरे कानुनी कारबाहीको बाटोमा जाने विभागका महानिर्देशक जितेन्द्र बस्नेतले बताए ।
