‘कीर्तिपुर पाँगाको चौधारानिर आइपुग्नुस्। म लिन आउँछु,’ टेकबहादुर सुनारले हामीलाई ठेगाना दिए।
चौधारा पुगेर केहीबेर कुरेपछि उनी हामीलाई लिन आए। त्यहाँबाट पूर्वपट्टिको सानो बाटो हुँदै केही मिनेट हिँडेपछि टिनले छाएका, टिनैले बारेका गुचमुच्च परेका तीन छाप्रा भएको स्थानमा हामी पुग्यौँ। जहाँ टेकबहादुरकी आमा अमृता सुनार थिइन्।
हुम्ला, अदानचुली–४ की वडा सदस्य अमृता सुनारसँगको तस्बिर केही दिनअघि उर्जा तथा जलस्रोतमन्त्री पम्फा भुसालले सामाजिक सञ्जालमा पोस्ट गरेकी थिइन्। हुम्लेली पहिरन लगाएकी महिलाले मन्त्रीसँग सिंहदरबारमा कुम जोडेर खिचाएको तस्बिर सार्वजनिक भएपछि उनीबारे चासो चुलिएको छ।
