गत चैत १९ गते पोखरामा नेकपा एमाले कास्की जिल्लाको समानान्तर कमिटी घोषणा गर्दै वरिष्ठ नेता माधवकुमार नेपालले भनेका थिए, ‘केपी ओलीबाट सबैभन्दा पीडित प्रदेश हो, गण्डकी प्रदेश । ठूलो त्याग, संघर्ष गरेका धेरैलाई टिकट दिइएन । अब म दिन्छु टिकट, चुनाव लड्न तयार रहनू ।’
हुन पनि गण्डकी प्रदेशमा एमालेको नेपाल समूह अत्यन्तै कमजोर छ । यहाँबाट एक जना पनि संघीय सांसद नेपाल समूहका छैनन् । ६० सदस्यीय गण्डकी प्रदेश सभामा एमालेका २७ सांसदमध्ये बागलुङका इन्द्रलाल सापकोटामात्र नेपाल समूहका हुन् ।
केन्द्रीय सदस्य तथा पूर्व सांसद श्रीमाया थकाली भन्छिन्, ‘ओली समूहले गण्डकी प्रदेशमा जहिल्यै बलमिच्याइँ ग-यो, (चुनावमा) टिकटै दिएन । जिल्लाबाटै सिफारिस नहुने, सिफरिस भइहाले प्रदेश र माथि पुग्दा काटिने । राम्रा नेता पनि यहाँ हेपिनुपरेको छ ।’
बुधबार दल विभाजनलाई सहज हुने गरी अध्यादेश जारी भएपछि नेता नेपालले नेकपा एमाले समाजवादी दल दर्ताका लागि निर्वाचन आयोगमा निवेदन दिएका छन् । आगामी चुनावमा अब उनी आफैं टिकट बाँड्ने ठाउँमा रहनेछन् । तर, यतिन्जेल साथ दिएका गण्डकीका धेरै नेताहरुले भने नेपालको साथ छाडेका छन् ।
नेता नेपालले दर्ता गरेको नयाँ पार्टीमा कास्कीका चुणामणि विक जंगली, तुलबहादुर गुरुङ, श्रीनाथ बराल, दिलकुमारी पन्त, तनहुँका प्रतापलाल श्रेष्ठ, पर्वतका विजय गुरुङ, स्याङ्जाकी शर्मिलादेवी पौडेल र तनहुँकी रेखा बस्याल समेटिएका छन् ।
