नेपाली कलाक्षेत्रका सफल कलाकार हुन् हरिहर शर्मा । नाटक, सिरियल होस् वा चलचित्र, सबैतिर उनको अभिनय देख्न सकिन्छ । प्रज्ञा प्रतिष्ठानबाट २०३० सालदेखि कलाकारिता सुरु गरेका उनी अहिले पनि यही कर्ममा छन् ।
अभिनयकर्मबाटै विभिन्न अवार्डका साथमा गोरखा दक्षिणबाहु, त्रिशक्ति पट्ट, इन्द्र राज्यलक्ष्मी प्रज्ञा पुरस्कार, सर्वनाम पुरस्कार, प्रज्ञा प्रतिष्ठान दीर्घ सेवा पदकलगायत थुप्रै पुरस्कार र पदवीबाट विभूषित उनी पछिल्लो समय नेपाल सङ्गीत तथा नाट्य प्रतिष्ठानका उपकुलपति हुन् । राष्ट्रिय नाचघर, प्रज्ञा प्रतिष्ठानमा विभिन्न सेवामा रहेर काम गरेका विभिन्न सङ्घसंस्थासँग समेत आबद्ध छन् ।
अभिनयका करिब आधा दर्जनभन्दा बढी पुस्तकसमेत लेखेका शर्मालाई धेरैले फिल्म ‘वासुदेव’ अभिनय कारणले चिन्ने गर्छन् । कतिपय समय एक छाक खाएर पनि कलाकारितामा टिकेका उनी जीवन अभिनय गर्ने कलाकार पनि हुन् । कलाकारिताको एउटै पुरस्कारबाटै काठमाडौँमा घर बनाउन सफल हरिहर शर्माका जीवनका विभिन्न पाटा रातोपाटीको ‘मेरो जीवन’ स्तम्भमा उनकै शब्दमा ।
ग्रेभी मासु आहा !
मेरो मनपर्ने खाना दाल, भात र तरकारी हो । तरकारीमा माछा, मासु, साग लगायत सबथोक मनपर्छ । साथीभाइ, परिवार र आफन्तसँग रेस्टुरेन्ट जान्छु ।
रेस्टुरेन्टको खानेकुरामा सिजलर, ग्रेभी मासु मनपर्छ । पकाउन पनि रुचि छ मेरो । सबथोक पकाउन सक्छु । मैले पकाएको परिवारले मीठो मान्छन् ।
